Viðskiptaráð Íslands óskar aðildarfélögum sínum og landsmönnum öllum gleðilegra jóla og farsældar á komandi ári. Í stað þess að senda út prentuð jólakort mun Viðskiptaráð afhenda Mæðrastyrksnefnd peningagjöf sem samsvarar kostnaði við prentun korta.

Með hliðsjón af aðstæðum á vinnumarkaði þarf ekki að undrast að ásókn í háskólanám skuli hafa aukist til muna nú um áramót. Þrátt fyrir að rekstur hins opinbera standi höllum fæti og mikilvægt sé að sýna aðhald á öllum sviðum telur Viðskiptaráð ekki skynsamlegt að takmarka þann fjölda sem boðið verði að stunda háskólanám á næsta ári.

Í 9. lið nýlegrar aðgerðaáætlunar ríkisstjórnarinnar í þágu fyrirtækja er lýst yfir vilja til að greiða fyrir langtímaeign lífeyrissjóða á fasteignum sem þeir hafa lánað fyrir. Þessi breyting er vissulega þörf, enda mega lífeyrissjóðir einungis halda slíkum eignum  í 18 mánuði nema í undantekningartilfellum. Fjármálaeftirlitið hefur túlkað skilyrði þess að sjóðirnir dragi sölu eigna mjög þröngt og því hafa undantekningartilfellin líklega verið færri en hagkvæmt væri. Það hefur leitt til þess að sjóðirnir hafi m.a. þurft að selja eignir á óheppilegum tíma, sem er engum til hagsbóta.

Menntamálanefnd Alþingis hefur nú til umfjöllunar frumvarp menntamálaráðherra sem miðar m.a. að því að gera starfsemi RÚV gagnsærri og bæta samkeppnisumhverfi fjölmiðla hér á landi.

Alþingi afgreiddi í gær lög um hækkun gjalda á áfengi, tóbaki, olíu og bifreiðum. Í fjárlögum næsta árs var gert fyrir að þessi gjöld myndu alls hækka um 11,5% á næsta ári, en í þessum nýju lögum, sem taka gildi strax, nemur hækkunin 12,5%. Ljóst að lög þessi eru til þess fallin að kynda undir verðbólgu, en hið opinbera ætti einmitt að gera allt sem í sínu valdi stendur til að draga úr verðbólguþrýstingi við núverandi ástand.

Ríkisstjórnin kynnti í dag sparnaðaraðgerðir við 2. umræðu fjárlaga, en samkvæmt tillögunum er gert ráð fyrir að sparnaður í rekstrarútgjöldum og tekjutilfærslum nemi um 24 milljörðum eða 5,7% af heildarútgjöldum ríkissjóðs til þessara málaflokka. Vissulega ber að fagna viðleitni ríkisstjórnarinnar til að hagræða í rekstri sínum, en engu að síður er framsetning þessara sparnaðaraðgerða villandi. Í raun er ekki um eiginlegan sparnað að ræða, heldur einungis áform um að auka ríkisútjgjöld minna en upphaflega var gert ráð fyrir í fjárlögum næsta árs.

Eins og áður hefur komið fram eru mörg erlend greiðslutryggingafélög hætt að veita íslenskum fyrirtækjum þjónustu. Viðskiptaráð hefur undanfarið unnið að úrlausn þessa vandamáls í samstarfi við fleiri aðila og gengur sú vinna vel.

Viðskiptaráð hefur nú útbúið upplýsingaskjal handa þessum fyrirtækjum þar sem m.a. er fjallað um stöðu efnahagsmála, endurskipulagningu bankakerfisins og hvernig hægt er að nálgast upplýsingar um fjárhag íslenskra fyrirtækja. Skjal þetta má nálgast hér, en aðildarfélagar Viðskiptaráðs geta e.t.v. nýtt sér það í samskiptum sínum við erlenda aðila.

Vegna þeirra truflana sem orðið hafa á bankastarfsemi hér á landi og áhrifa þess á atvinnulífið hefur fjármálaráðuneytið í dag beint þeim tilmælum til skattstjóra að fellt verði tímabundið niður álag vegna skila á virðisaukaskatti sem er á gjalddaga á morgun, 5. desember. Sú niðurfelling gildir í eina viku eða til 12. desember 2008.

Upplýsingaskjal handa erlendum aðilum, "The Icelandic Economic Situation: Status Report", hefur nú verið uppfært. Skjalið má nálgast hér.

Viðskiptaráð Íslands boðaði til blaðamannafundar í hádeginu í dag í tilefni af útgáfu leiðbeininga um stjórnarhætti opinberra fyrirtækja. Leiðbeiningarnar eru samvinnuverkefni Viðskiptaráðs Íslands, Nadsaq OMX Ísland og Samtaka atvinnulífsins og eru þær byggðar á sambærilegum reglum frá Efnahags- og framfarastofnun (OECD), en þó aðlagar að íslensku umhverfi.

Mikil þátttaka var á árlegum fundi Viðskiptaráðs Íslands í tilefni útgáfu peningamála á Hilton Reykjavík Nordica nú í morgun. Fast að 400 gestir sóttu fundinn, sem að þessu sinni bar yfirskriftina Fjármálakreppan – er lausn í sjónmáli? Davíð Oddsson, formaður bankastjórnar Seðlabanka Íslands fór yfir stöðu efnahagsmála í tilefni af útgáfu Peningamála. Friðrik Már Baldursson forstöðumaður Rannsóknarstofnunar um fjármál við Háskólann í Reykjavík stýrði fundinum og í pallborði sátu Arnór Sighvatsson, aðalhagfræðingur Seðlabankans, Yngvi Örn Kristinsson, forstöðumaður hagfræðideildar Landsbankans, Gylfi Zoega, deildarforseti og prófessor við hagfræðideild Háskóla Íslands og Ingólfur Bender, forstöðumaður greiningardeildar Glitnis. Finnur Oddsson, framkvæmdastjóri Viðskiptaráðs setti fundinn.

Samkvæmt fréttatilkynningu frá fjármálaráðuneytinu frá því á föstudaginn síðasta þá samþykkti ríkisstjórnin frumvarp fjármálaráðherra um tímabundnar breytingar á tollalögum. Frumvarpið veitir virðisaukaskattskyldum aðilum er gjaldfrest á hluta af aðflutningsgjöldum, þ.m.t. vsk., vegna innflutnings á tímabilinu september til október 2008. Greiðsla vegna þeirra féll í gjalddaga í dag, 17. nóvember, en þess í stað er aðilum heimilt að standa skil á greiðslunni með þremur jöfnum greiðslum, sú fyrsta gjaldfél í dag, sú næsta þann 15. desember 2008 og þriðja greiðslan þann 15. janúar 2009. Þeir sem kjósa að fara þessa leið greiða almenna meðalvexti af þeim hluta greiðslunnar sem frestað er í stað dráttarvaxta. Fjármálaráðherra hefur beint þeim tilmælum til tollyfirvalda að þau loki ekki fyrir tollafgreiðslu hjá þeim sem standa í skilum við aðflutningsgjöld í samræmi við ofangreint á meðan frumvarpið er til meðferðar á Alþingi.

Seðlabankinn hefur birt ítarlegar upplýsingar um greiðslur á milli landa þegar þær fara um Seðlabankann:

Eins og Viðskiptaráð hefur áður bent á er afar brýnt að þau fyrirtæki, sem eiga eftir að skila inn ársreikningi 2007 (og í sumum tilfellum árshlutareikningi 2008), geri það hið fyrsta. Þetta er forsenda þess að erlend greiðslutryggingarfélög fáist aftur til að tryggja greiðslur íslenskra fyrirtækja. Upplýsingar sendist á reports@creditinfo.com.

Viðskiptaráð Íslands hefur í samstarfi við Kauphöllina og Samtök Atvinnulífsins þróað leiðbeiningar um stjórnarhætti opinberra fyrirtækja að fyrirmynd OECD. Vinna þessi er nú á lokastigi. Nánari upplýsingar veitir Haraldur I. Birgisson, lögfræðingur Viðskiptaráðs.

Staðan á gjaldeyrismarkaði hefur lítið breyst undanfarna daga og er temprun gjaldeyrisútflæðis Seðlabankans enn við lýði. Viðskiptabankarnir þrír, Glitnir, Landsbanki og Kaupþing, geta afgreitt erlendar greiðslur í einhverjum mæli en miðlunin er óábyggileg og miklum takmörkunum háð. Sparisjóðabankinn býr þó sem fyrr yfir greiðslumiðlunarkerfi sem virkar.

Staðan á gjaldeyrismarkaði er lítið breytt og er temprun gjaldeyrisútflæðis Seðlabanka enn við lýði. Viðskiptabankarnir þrír geta þar af leiðandi ekki afgreitt erlendar greiðslur nema í samræmi við tilmæli Seðlabanka. Sparisjóðabankinn býr þó enn að greiðslumiðlunarkerfi sem virkar í nær öllum myntum.

Þrátt fyrir ákveðna erfiðleika í erlendri greiðslumiðlun eru mörg dæmi um að fyrirtæki hafi fundið leiðir sem virka ágætlega. Viðskiptaráð óskar hér með eftir upplýsingum um góða reynslu aðildarfélaga sinna í þessum efnum. Markmiðið er svo að koma árangursríkum aðferðum á framfæri við aðra sem geta nýtt sér þær. Vinsamlegast hafið samband við ráðið í síma 510-7100 eða með því að senda póst á dsd@vi.is.

Uppfært upplýsingaskjal handa erlendum aðilum um stöðu mála á Íslandi er nú hægt að nálgast á vef Viðskiptaráðs. Skjalið er hér.

Viðskiptaráð hefur útbúið glærusett um fjármálakrísuna á Íslandi handa erlendum aðilum. Glærurnar eru á ensku og þær má nálgast hér.

Viðskiptaráð hefur útbúið glærusett um styrklieka íslenska hagkerfisins handa erlendum aðilum. Glærurnar eru á ensku og þær má nálgast hér.

Ennþá eru hnökrar á erlendri greiðslumiðlun en þó eru einhver merki þess að ástandið sé að skána. Bankarnir geta afgreitt erlendar greiðslur að einhverju leyti um hjáleið í gegnum Seðlabankann og Sparisjóðabankinn býr sem fyrr að greiðslumiðlunarkerfi sem virkar. Þá sendi Seðlabankinn frá sér tilkynningu í gær þar sem sagt er að greiðslumiðlun til og frá Bretlandi gangi nú betur en áður. Þetta eru ánægjulegar fréttir, enda hafa hnökrar á greiðslum í pundum verið umtalsverðir upp á síðskastið.

Líklegt er að ástandið á gjaldeyrismarkaði haldi áfram að skána á næstu dögum og vikum þótt ólíklegt sé að gjaldeyrishöft Seðlabankans verði að fullu afnumin í náinni framtíð. Ekki verður unnt að afnema gjaldeyrishöft fyrr en endanlegt samkomulag við Alþjóðagjaldeyrissjóðinn liggur fyrir sem og upplýsingar um lánveitingar til Íslands.

Seðlabanki Íslands sendi frá sér tilkynningu í gær þar sem útflytjendur og aðrir sem eiga gjaldeyri eru hvattir til að bjóða gjaldeyri til sölu á tilboðsmarkaði Seðlabankans. Í tilkynningunni segir að verðmyndun utan tilboðsmarkaðar sé til þess fallin að seinka heilbrigðum viðskiptaháttum með gjaldeyri og skaða tilraunir til að koma þeim í eðlilegt horft.

Viðskiptaráð tekur undir þessi tilmæli Seðlabankans og hvetur félaga til versla með gjaldeyri á þar til gerðum tilboðsmarkaði. Þannig verður best stuðlað að eðlilegri verðmyndun íslensku krónunnar og flýtt fyrir því að eðlilegar aðstæður skapist á gjaldeyrismarkaði.

Nánari upplýsingar um greiðslumiðlun Seðlabankans má nálgast hér.

Á aðalfundi Sænsk-íslenska viðskiptarráðsins ( SÍV)  sem haldinn var  þann 29. október var Jafet S.Ólafsson endurkjörinn formaður ráðsins. Nýir í stjórn eru Kristín Pétursóttir forstjóri Auðar Capital og Þórarinn Ævarsson forstjóri IKEA  en þau taka við af Kristjáni Jóhannessyni, Seafood Union og Kalle Byström, Aviareps en þeir hafa báðir setið um árabil í stjórn SÍV og eru þeim þökkuð störf í þágu ráðsins.

Aðrir stjórnarmenn þau Alfreð Jóhannsson, Ó. Johnson & Kaaber, Ásta Arnþórsdóttir, Islandia AB, Jóhann G. Jóhannsson,Glitni, Jóhanna Waagfjörð,Högum, Karítas Kjartansdóttir, VBS og Knútur G. Hauksson, Heklu voru endurkjörnir.  Endurskoðendur voru kjörnir þeir Bergþór Konráðsson, Eigarhaldsfélaginu Frey og Geir Þórarinn Zoega, Ísaga.

Eftirfarandi tilkynning hefur borist frá Seðlabankanum:

"Vegna hinna sérstöku aðstæðna sem upp komu í rekstri banka nú í október lögðust niður við­skipti á millibankamarkaði með gjaldeyri. Á þeim markaði sinntu stóru við­skipta­bank­arnir þrír hlutverki viðskiptavaka samkvæmt reglum um tíðni tilboða, verðmyndun og fleira.

Í staðinn kom Seðlabankinn upp svonefndum tilboðs­markaði fyrir gjaldeyri, saman­ber tilkynningu á heimasíðu bank­ans 15. október s.l. Á þeim markaði eru fleiri fjár­málafyrirtæki en við fyrri skipan en taka ekki á sig skyldur viðskiptavaka. Niður­stöður um viðskipti og verð eru birtar daglega á heimasíðu Seðlabankans.

Ætla má að unnt sé að auka veltu og styrkja verðmyndun á tilboðsmarkaðnum. Í því skyni eru útflytjendur og aðrir sem eiga gjaldeyri eindregið hvattir til að bjóða hann til sölu á þeim vett­vangi. Þeir geta snúið sér til fjármálafyrirtækja sem eiga viðskipti við Seðla­bankann og falið þeim að koma tilboðum sínum á framfæri.

Verðmyndun utan tilboðsmarkaðar er til þess fallin að seinka heilbrigðum viðskipta­háttum með gjaldeyri og skaða tilraunir til að koma þeim í eðlilegt horf. Auk þess eru utanmarkaðsviðskipti ógagnsæ og áhættusöm."

Aðgengi að gjaldeyri er áfram takmarkað í samræmi við tímabundna temprun Seðlabanka á gjaldeyrisútflæði. Bankarnir þrír, Glitnir, Landsbanki og Kaupþing, geta í einhverjum mæli afgreitt erlendar greiðslur en miðlunin er ennþá óáreiðanleg. Sparisjóðabankinn getur sinnt erlendri greiðslumiðlnun í flestum myntum, en þó eru miklir hnökrar milli Íslands og Bretlands.

Nokkrir hnökrar eru enn á viðskiptum með gjaldeyri. Aðgengi að gjaldeyri er enn takmarkað í samræmi við tímabundna temprun Seðlabanka Íslands á gjaldeyrisútflæði. Viðskiptabankarnir þrír hafa í einhverjum mæli getað sinnt greiðslumiðlun á milli landa um hjáleið í gegnum Seðlabankann en miðlunin er óáreiðanleg og algengt að greiðslur stöðvist í ferlinu. Sparisjóðabankinn hefur getað sinnt greiðslumiðlun án aðstoðar Seðlabankans.

Í dag bárust fréttir af því að viðskipti hefðu verið með íslenskar krónur á alþjóðlegum gjaldeyrismarkaði í kjölfar vaxtahækkunar Seðlabankans. Í þeim viðskiptum er gengið sagt hafa verið 240 krónur á evru. Þó þetta gengið sé langt undir skráðu viðmiðunargengi Seðlabankans, sem er 152 krónur á evru, eru þetta engu að síður jákvæð tíðindi. Þetta bendir til þess að vaxtahækkun Seðlabankans sé jafnvel þegar byrjuð að skila tilætluðum árangri, sem er m.a. að auka tiltrú alþjóðlegra aðila á íslensku krónunni.

Seðlabankinn hækkaði stýrivexti um 600 punkta í dag og eru þeir nú 18%. Vextir bankans hafa ekki verið hærri siðan verðbólgumarkmið var tekið upp árið 2001. Vaxtahækkunin er að kröfu Alþjóðagjaldeyrissjóðsins og er markmið hennar fyrst og fremst að styðja við gengi íslensku krónunnar. Verðbólga á Íslandi er í hæstu gildum sem sést hafa í um tuttugu ár og ljóst að gengisveiking síðustu vikna setur enn frekari þrýsting í átt til meiri verðbólgu. Hærri vextir og aðkoma Alþjóðagjaldeyrissjóðsins verður þó vonandi til þess draga úr þrýstingi til frekari gengisveikingar. Engu að síður er ljóst að 18% stýrivextir koma harkalega niður á íslenskum almenningi og fyrirtækjum og því afar brýnt að vextir verði lækkaðir aftur um leið og aðstæður leyfa.

Uppfært upplýsingaskjal handa erlendum aðilum er nú að finna á heimasíðu Viðskiptaráðs. Skjalið má nálgast hér.

Fátt hefur dregið til tíðinda hvað varðar stöðuna á gjaldeyrismarkaði frá því fyrir helgi. Temprun gjaldeyrisútflæðis er enn við lýði og sem fyrr eru verulegir hnökrar á greiðsluflæði til og frá Íslandi. Sparisjóðabankinn getur þó afgreitt erlendar greiðslur í flestum myntum.

Í kjölfar tilkynningar um aðkomu IMF hefur upplýsingaskjal handa erlendum aðilum verið uppfært. Uppfærða útgáfu má nálgast hér.

Viðskiptaráð Íslands fagnar því að ríkisstjórn Íslands hafi óskað eftir formlegu samstarfi við Alþjóðagjaldeyrissjóðinn (IMF) um að koma á efnahagslegum stöðugleika á Íslandi.

Ljóst er að staða íslenskra efnahagsmála vekur athygli víða um heim. Fjölmargir erlendir aðilar hafa sett sig í samband við innlend fyrirtæki með spurningar sem lúta að stöðu mála á Íslandi. Margir átta sig illa á stöðunni og óvissan er mikil.

Fátt hefur dregið til tíðinda hvað varðar stöðuna á gjaldeyrismarkaði síðan í gær. Temprun gjaldeyrisútflæðis er áfram í gildi og bankarnir þrír, Glitnir, Landsbanki og Kaupþing, geta því enn ekki afgreitt erlendar greiðslur nema í sérstökum undantekningartilfellum skv. tilmælum Seðlabankans.

Eins og fram hefur komið var upphaflegri ákvörðun Fjármálaeftirlitsins um ráðstöfun eigna og skulda gömlu bankanna breytt á þann veg að nýir bankar taka ekki við slíkum samningum líkt og gert hafði verið ráð fyrir. Meginástæðan er sú að bankarnir hefðu ekki getað afhent þann gjaldeyri sem umræddir samningar kváðu á um. Í ákvörðuninni segir orðrétt „verði ákvörðuninni ekki breytt að þessu leyti er talið sýnt að Nýi Landsbanki Íslands hf. muni vanefna skuldbindingar sínar samkvæmt þessum samningum með ófyrirsjáanlegum afleiðingum“.

Ljóst er að þetta mun koma illa við mörg fyrirtæki með opna skiptasamninga og getur hreinlega riðið baggamuninn í þeirra rekstri. Gert er ráð fyrir svörum frá viðskiptaráðuneytinu eða öðrum fulltrúum stjórnvalda um stöðu þessara mála a samráðsfundi aðila vinnumarkaðar og Viðskiptaráðs síðar í dag.

Þannig hljómaði fyrsta spurning slóvensks fréttamanns sem staddur var hér í síðustu viku til að fylgjast með sjónarspili hamfara í íslensku hagkerfi.  Vikunni hafði hann varið í að tala við Íslendinga.  Viðmælendur hans komu úr stjórnsýslu, viðskiptalífi, heilsugæslu, menntakerfinu og víðar.  Venjulegir Íslendingar.  Það kom honum spánskt fyrir sjónir að þrátt fyrir atburði síðustu vikna og augljóst áfall fyrir íslenskt efnahagslíf, þá virtist honum lífið ganga sinn vanagang.  Bankar eru opnir, búðir afgreiða vörur, bílar keyra á götum, fólk fer til vinnu og börn í skóla.  Með öðrum orðum, þá hefur að einhverju marki tekist að halda lágmarks virkni í gangverki hagkerfisins.

Eftirfarandi grein birtist í Markaði Fréttablaðsins, miðvikudaginn 22. október:

Undanfarnir dagar og vikur hafa verið viðburðaríkur tími í lífi flestra Íslendinga. Líkja mætti ástandinu við einskonar samslátt tvennra tíma. Þrátt fyrir að fátt hafi breyst á yfirborðinu; öll mannvirki eru enn á sínum stað, verslun og önnur þjónustu stendur enn til boða, fréttir eru ennþá klukkan sjö og svo mætti lengi telja. Engu að síður hafa ásýnd og framtíðarhorfur hagkerfisins gjörbreyst í kjölfar hruns íslenskra fjármálafyrirtækja.

Viðskiptaráð fagnar því að vinna sé á lokastigi innan fjármálaráðuneytisins að frumvarpi sem gerir ráð fyrir endurgreiðslu hluta af innflutningsgjöldum ef bifreiðar eru seldar úr landi.

Bankarnir þrír – Glitnir, Landsbanki og Kaupþing – geta sem fyrr ekki afgreitt erlendar greiðslur nema í undantekningartilfellum skv. tilmælum Seðlabankans um temprun útflæðis á gjaldeyri. Sparisjóðabanki Íslands (áður Icebank), sem fram til þessa hefur getað sinnt erlendri greiðslumiðlun í flestum myntum, getur heldur ekki afgreitt erlendar greiðslur í dag. Ástæðan er krafa Seðlabankans um hærri veðtryggingar frá Sparisjóðabankanum, sem og fleiri fyrirtækjum, sem skapar töluvert óvissuástand.

Miklir hnökrar hafa verið á greiðslum milli Íslands og Bretlands síðan bresk yfirvöld tóku ákvörðun um að frysta eignir Landsbankans þar í landi. Í tilkynningu sem Seðlabanki Íslands sendi frá sér í dag segir að unnið sé að lausn þessa máls og að sá hnútur hafi nú verið leystur að mestu. Engu að síður er tekið fram að þó megi búast við því að það taki nokkra daga í viðbót að koma greiðslum milli landanna í lag. Ljóst er því að áfram verða hnökrar á viðskiptum við Bretland um nokkurt skeið.

Ljóst er að íslenska ríkið þarf utanaðkomandi aðstoð til að greiða úr þeim vanda sem upp er kominn, ekki síst vegna þess ófremdarástands sem nú ríkir á gjaldeyrismarkaði.

Fátt hefur dregið til tíðinda hvað varðar stöðuna á gjaldeyrismarkaði frá því fyrir helgi. Temprun gjaldeyrisútflæðis er enn við lýði og bankarnir þrír -  Glitnir, Landsbanki og Kaupþing - geta því enn ekki afgreitt erlendar greiðslur nema í sérstökum undantekningartilfellum.

Viðskiptaráði hefur borist greinargerð frá fjármálaráðuneyti Bretlands. Í greinargerðinni er fjallað um tilmæli um kyrrsetningu eigna Landsbankans. Er þar að finna skilgreiningu og ítarlega lýsingu á umfangi og afleiðingum þessarar aðgerðar. Markmiðið er að liðka fyrir eðlilegu fjárstreymi milli Íslands og Bretlands. Greinargerðina má nálgast hér.

Gjaldeyrismál
Temprun gjaldeyrisútflæðis Seðlabankans er enn við lýði. Bankarnir þrír, Glitnir, Landsbanki og Kaupþing, geta enn ekki afgreitt erlendar greiðslur nema í sérstökum tilfellum skv. reglum Seðlabankans. Sparisjóðabanki Íslands (áður Icebank) hefur aftur á móti getað afgreitt erlendar greiðslur í dag í öllum myntum.

Eftirfarandi yfirlýsing hefur borist frá Seðlabankanum:

„Vegna þeirra sérstöku aðstæðna sem eru í bankastarfsemi þessa dagana höfum við ástæðu til að ætla að greiðslur sem eiga að koma frá erlendum aðilum til íslenskra banka séu stöðvaðar á leiðinni.

Ef erlendir aðilar telja að óvissa ríki um að greiðslur skili sér til réttra aðila, eða óttast að þeir skapi sér ábyrgð vegna þess að greiðslur skili sér ekki, hefur Seðlabanka Íslands lýst því yfir við erlendar lánastofnanir að hann tryggi að allar greiðslur sem bankar sendi um reikninga Seðlabankans á reikninga innlendra lánastofnana muni skila sér til eigenda reikninga í við komandi lánastofnunum.“

Erlend greiðslumiðlun enn í ólagi
Greiðslumiðlun innanlands gengur eðlilega fyrir sig og það sama á við um notkun íslenskra greiðslukorta, jafnt innanlands sem utan. Hvað varðar greiðslur til og frá Íslandi hefur aftur á móti fátt breyst síðan í gær og er temprun gjaldeyrisútflæðis enn við lýði.

Seðlabanki Íslands lækkaði stýrivexti um 350 punkta í morgun og standa þeir nú í 12%. Viðskiptaráð fagnar þessari aðgerð, enda hefur ráðið lengi talið vaxtalækkun vera eitt helsta hagsmunamál íslenskra fyrirtækja og heimila. Nú þegar við blasir samdráttur og aukið atvinnuleysi er ljóst að háir stýrirvextir Seðlabanka þjóna takmörkuðum tilgangi.

Næsti reglulegi vaxtaákvörðunarfundur Seðlabankans er 6. nóvember og telur Viðskiptaráð rétt að vextir verði lækkaðir enn frekar, enda fullt svigrúm til þess m.v. núverandi aðstæður.

Samkvæmt upplýsingum frá fjármálaráðuneyti verður viðurlögum vegna vanskila á staðgreiðslu þeirra opinberru gjalda sem eru á gjalddaga í dag ekki beitt í viku frá deginum í dag.

Upplýsingakröfur erlendra greiðslutryggingarfyrirtækja um íslensk fyrirtæki hafa verið hertar. Í ljósi þess viljum við benda fyrirtækjum sem eiga eftir að skila inn ársreikningi 2007 (og í sumum tilfelli árshlutareikningi 2008) að gera það fljótt, enda er það nú forsenda þess að greiðslur íslenskra fyrirtækja hjá fyrrgreindum greiðslutryggingarfélögum fáist tryggðar. Upplýsingar sendist á reports@creditinfo.is. Mjög mikilvægt er að liðka fyrir þessum ábyrgðum.

Viðskiptaráð Íslands, Samtök atvinnulífsins og Kauphöll Íslands áttu fyrir röskum fimm árum frumkvæði að því að setja fram leiðbeiningar um stjórnarhætti  fyrirtækja.  Með þessum leiðbeiningum var stefnt að því að skapa meiri festu og gegnsæi í stjórn fyrirtækja og efla traust. 

Hnökrar hafa verið á samskiptum íslenskra fyrirtækja við fyrirtæki í Bretlandi.  Til að liðka fyrir samskiptum má nýta sér eftirfarandi gögn.

Umræða um íslenskt efnahagslíf hefur síðustu daga verið afar neikvæð.  Ljóst er þó að við búum við fjölda styrkleika sem ástæða er til að draga fram í umræðuna. 

Unnið er að því að koma á greiðslumiðlun með erlendan gjaldmiðla.  Seðlabankinn hefur gefið frá sér tilkynningu um “tímabundna temprun á útflæði gjaldeyris” sem sjá má hér: http://www.sedlabanki.is/lisalib/getfile.aspx?itemid=6491, en um er að ræða gjaldeyrishöft sem brýnt er að látið verði af sem fyrst.  Samkvæmt upplýsingum frá Seðlabanka eru fyrirtæki beðin um að beina fyrirspurnum um gjaldeyriskaup til viðskiptabanka og sparisjóða viðkomandi fyrirtækis. 

Eftir því sem næst verður komist er greiðslumiðlun komin í sæmilegt horf hjá Nýja Landsbanka og gert er ráð fyrir að Nýi Glitnir og Kaupþing komist af stað í dag eða á morgun.  Þar fer greiðslumiðlum fram í gegnum kerfi Seðlabanka.  Samkvæmt upplýsingum frá Icebank er greiðslumiðlun þar í lagi, en nánari upplýsingar má fá í síma 540 4030.  Rétt er að taka það fram að Icebank virðist eini einkarekni bankinn á Íslandi sem í dag getur sinnt þessari þjónustu. 
Í þeirra miklu breytinga sem átt hafa sér stað á fjármálamarkaði undanfarna daga er rétt að árétta mikilvægi þess að gætt sé að því að viðhalda samkeppni á fjármálamarkaði í þeirri framtíðarlausn sem stjórnvöld skipuleggja nú.

Nánari upplýsingar verða birtar á heimasíðu Viðskiptaráðs þegar þær berast.

Stofnaður hefur verið vinnuhópur til að fylgjast með afleiðingum fjármálakreppunnar fyrir atvinnulífið í landinu. Vinnuhópurinn er skipaður fulltrúum allra aðildarsamtaka Samtaka atvinnulífsins og fulltrúum Viðskiptaráðs Íslands. Safnað verður saman upplýsingum um áhrif á fyrirtæki, vandamál sem upp koma og hvernig unnt er að bregðast við þeim. Samtökin munu koma upplýsingum á framfæri við fulltrúa ríkisstjórnarinnar og gæta þannig hagsmuna fyrirtækjanna.

Af óviðráðanlegum ástæðum var ákveðið að fresta morgunverðarfundi Viðskiptaráðs Íslands og Glitnis sem átti að fara fram í morgun.

Viðskiptaráð og Glitnir biðja skráða gesti forláts á þessu.

Fyrr á þessu ári fagnaði Íslandspóstur stórafmæli en þá voru tíu ár liðin
frá því fyrirtækið tók til starfa sem sjálfstætt hlutafélag í eigu ríkisins. Á
þeim tíma sem liðinn er frá stofnun fyrirtækisins hefur félagið
endurskilgreint hlutverk sitt og starfsemi á ýmsan máta. Verulega hefur
dregið úr vægi almannaþjónustunnar og fyrirtækið hefur sótt inn á nýja
markaði. Grunnur þessarar stefnu hefur ekki verið mótaður af
stjórnendum fyrirtækisins enda gefa samþykktir þess fullt svigrúm til
útvíkkunar á starfseminni.

Þann 18. september birtist eftirfarandi grein í Morgunblaðinu:

Þann 1. október næstkomandi verður þing sett á Alþingi í 136. skipti.  Þar ber að venju hæst að fjárlög næsta árs verða lögð fram, að þessu sinni í skugga ögrandi aðstæðna í efnahagsmálum og athafnalífi.  Verðbólga og vextir eru í hæstu hæðum og miklar efasemdir eru um gagnsemi sjálfstæðrar peningastefnu, bæði meðal almennings og fyritækja.  Þótt hagvaxtartölur 2. ársfjórðungs þessa árs sýni enn ágætan vöxt er almennt búist við verulegum samdrætti í hagkerfinu á næstu misserum.  Margir eru jafnvel á því að samdráttar gæti nú þegar og benda máli sínu til rökstuðnings á samdrátt í þjóðarútgjöldum, en einkaneysla dróst til að mynda saman um 3,2% á 2. ársfjórðungi m.v. sama fjórðung árið áður.

Viðskiptaráð vill vekja athygli aðildarfélaga sinna og annarra íslenskra fyrirtækja á erlendri svikamyllu sem gengur undir nafninu EuroBusinessGuide. Viðskiptahættir þessara aðila eru afskaplega vafasamir og ganga þannig fyrir sig að fyrirtækjum er sendur tölvupóstur þar sem þau eru hvött til að skrá sig á fyrirtækjalista á vefnum, sjá hér. Undir tölvupóstinn skrifar einhver aðili og fyrir neðan nafn hans stendur eitthvað á þá leið að uppfærsla í skránna sé ókeypis og er það merkt með upphrópunarmerki og stórum feitletruðum stöfum. Það gefur viðkomandi fyrirtæki til kynna að það sé nú þegar skráð á þennan lista og þurfi einungis að fylla eyðublaðið út til að vera áfram skráð, endurgjaldslaust. Í smáa letri eyðublaðsins kemur hins vegar fram að viðkomandi fyrirtæki sé að skrá sig til þriggja ára og fyrir það þurfi að borga 990 evrur árlega. Veittur er sjö daga frestur til að hætta við en reikningurinn kemur mun síðar og þegar fólk áttar sig á svikunum er fresturinn runninn út.

Hátt í 70 manns mættu á morgunverðarfund Viðskiptaráðs á Grand Hótel Reykjavík nú í morgun. Tilefni fundarins er skýrsla Viðskiptaráðs sem ber heitið Útþensla hins opinbera: orsakir, afleiðingar og úrbætur , en hún var gefin út nú á vormánuðum. Árni M. Mathiesen fjármálaráðherra opnaði fundinn, Finnur Oddsson framkvæmdastjóri Viðskiptaráðs hélt stutt erindi um núverandi stöðu og leiðir úr henni, Frosti Ólafsson hagfræðingur Viðskiptaráðs kynnti helstu niðurstöður skýrslunnar og Þórður Víkingur Friðgeirsson lektor við Háskólann í Reykjavík kynnti nýja leið til aukins aðhalds í ríkisframkvæmdum. Að loknum framsögum sátu framsögumenn fyrir svörum í pallborði ásamt Katrínu Jakobsdóttur alþingismanni, Pétri Blöndal alþingismanni og Jóni Bjarka Bentssyni hjá greiningardeild Glitnis.

Dagana 21. – 23. ágúst var árlegur fundur Viðskiptaráða Norðurlandanna haldinn í Tampere, Finnlandi. Efni fundarins að þessu sinni var alþjóðavæðingin og áhrif hennar á innviði Norðurlandanna. Það var ályktun fundarins að alþjóðavæðingin þyrfti að hefjast heima fyrir með því m.a. að auðvelda aðfluttum einstaklingum að aðlagast nýju heimalandi og með því að efla tungumálakennslu í skólum. Það var einnig ályktun fundarins að frjálsræði í viðskiptum og opin hagkerfi myndu efla jafnræði og lýðræði.

Meðfylgjandi grein birtist í Viðskiptablaðinu miðvikudaginn 27. ágúst:

Nýr skóli – betra atvinnulíf

Síðastliðinn mánudag bættist í flóru íslenskra menntastofnana nýr og spennandi grunnskóli.  Þennan fyrsta kennsludag mættu til náms á annan tug barna á aldrinum 13 til 15 ára í stofu 209 á annari hæð í Garðaskóla í Garðabæ. Í skólanum er allt nám einstaklingsmiðað, þ.e. sniðið að þörfum hvers og eins nemanda, bæði eftir aldri og námsgetu. Námsáætlanir eru þannig mótaðar fyrir hvern nemanda, enda er bakgrunnur og aldur þeirra misjafn. Í skólanum nýta allir nemendur fartölvu, bæði í skólanum og til heimavinnu. Unnið er eftir viðurkenndri alþjóðlegri námsskrá og námsstöðlum, sem eru í öllum aðalatriðum í samræmi við námsskrá grunnskóla á Íslandi. 

Meðfylgjandi grein birtist í Markaðnum miðvikudaginn 30. júlí:

Hvað viltu verða þegar þú verður stór?

Flestir hafa fengið þessa spurningu einhvern tímann á lífsleiðinni. Þegar börn svara henni miðast svarið í flestum tilfellum við þær stéttir sem helst er litið upp til á æskuárunum. Krakkar vilja verða löggur, íþróttaálfar, slökkviliðsmenn eða Solla stirða. Þegar aldurinn færist yfir fara aðrir hlutir að vega þyngra eins og launakjör, starfsréttindi, samfélagsleg virðing og völd. Að sama skapi veltur áhugi fólks á tíðaranda hverju sinni.

Meðfylgjandi grein birtist í Viðskiptablaðinu, miðvikudaginn 30. júlí:

Staða sparisjóðanna enn óljós

Síðasta sumar gaf Viðskiptaráð út skoðun um stöðu sparisjóðanna þar sem var stiklað á stóru um starfsumhverfi þeirra. Það er álit ráðsins að sparisjóðirnir standi halloka í samkeppni við önnur fjármálafyrirtæki og ræður þar óhagfellt lagaumhverfi mestu. Sparisjóðirnir búa við ógagnsætt og íþyngjandi umhverfi sérreglna sem hefur skert samkeppnishæfni þeirra á ýmsum sviðum. Afleiðingin er m.a. sú að kjósi stjórnendur og stofnfjáreigendur að losa sjóðina undan viðjum regluverksins með hlutafjárvæðingu þá er stjórn sjóðanna á sama tíma framseld til opinberra aðila. Hlutafjárvæðing er því ríkisvæðing í tilfelli margra sparisjóða.

Í dag kom út skýrsla Viðskiptaráðs Útþenslan hins opinbera: orsakir, afleiðingar og úrbætur þar sem fjallað er um fjármál hins opinbera og úrræði nú í lok langs hagvaxtarskeiðs í íslensku hagkerfi. 

Í dag fór fram fyrsti fundur ráðgjafahóps Viðskiptaráðs Íslands vegna rekstrarumhverfis lítilla og meðalstórra fyrirtækja. Flest íslensk fyrirtæki falla í þenna flokk og eru mikilvægir drifkraftur, til að mynda hvað varðar atvinnu- og nýsköpun. Því er samkeppnishæfni íslensks atvinnulífs að stórum hluta háð því að sem best verði hlúð að slíkum rekstri.

Markmiðið með vinnu hópsins er að draga fram og ræða helstu ögranir sem stjórnendur lítilla og meðalstórra fyrirtækja standa frammi fyrir í sínum rekstri.  Í þeim efnum mun Viðskiptaráð leggja áherslu á málaflokka sem lúta að fjármögnun, mönnun og vinnumarkaður, umhverfi reglugerða, samskiptum við hið opinbera, hagrænu umhverfi og innviðum til stuðnings atvinnulífi. Í ráðgjafahópnum er breiður hópur félaga Viðskiptaráðs og mun vinna hans verða ráðinu til leiðsagnar um áherslur í málefnastarfi, auk þess sem hún mun nýtast þátttakendum við að kljást við dagleg viðfangsefni í eigin rekstri.

Eftirfarandi grein birtist í Viðskiptablaðinu þann 4. júní:

Ætti að stofna fasteignasölu ríkisins?

Í kjölfar nýlegrar yfirlýsingar stjórnvalda um fyrirhugaðar breytingar og uppskiptingu á starfsemi Íbúðalánasjóðs hafa vaknað upp miklar umræður um stöðu og hlutverk sjóðsins á íslenskum fasteignalánamarkaði. Eins og oft vill gerast með málefni sem verða að pólitísku bitbeini hefur umræðan verið villandi og lituð af skammtímahagsmunum.

Undanfarna mánuði hefur Ísland verið töluvert í kastljósi erlendra fjölmiðla.  Umfjöllunin hefur raunar verið langt umfram það sem ætla mætti miðað við títtnefnda höfðatölu og smæð landsins.  Í flestum tilfellum kemur þetta ekki til af góðu.  Efasemdir hafa verið uppi um styrk hagkerfisins og fjármálageirans, einkum vegna einkenna ofþenslu og hlutfallslegrar stærðar hins síðarnefnda í íslensku hagkerfi.  Stærð fjármálageirans og smæð hagkerfisins veldur því að áhrif alþjóðlegs fjármálaóróa eru jafnvel meiri hérlendis en víða annarstaðar.  Fyrir þá sem fylgjast með erlendri umfjöllun um Ísland teljast fyrirsagnir á borð við að „Ísland sé að bráðna“ eða „Að sprungur myndast í ísnum“  varla til tíðinda.  Þrátt fyrir að heldur hafi dregið úr slíkum fréttaflutningi síðustu vikur er ljóst að orðspor og ímynd Íslands hefur beðið hnekki. 

RSE, Viðskiptablaðið og Viðskiptaráð Íslands standa fyrir morgunverðarfundi um efnahagsmál föstudaginn 6. júní nk. í Háskólanum í Reykjavík 3. hæð, kl. 8.15. Dr. Eamonn Butler, forstöðumaður Adam Smith Institute í London og höfundur bókarinnar The Best Book on The Market flytur erindi um efnhagsmál, stjórnmál og hið frjálsa hagkerfi.

Dr. Eamonn Butler er hér á landi í boði RSE, en hann hefur nýlega gefið út bókina The Best Book on the Market og undirtitlinum, how to stop worrying and love the free economy. Á heimasíðu Adam Smith stofnunarinnar er haft eftir Butler að hann hafi áttað sig á því þegar hann lærði í hagfræði í háskóla að prófessorarnir hefðu ekki haft á réttu að standa. Með því að líta á fólk eins og vélmenni og reyna að gera hagfræði að vísindum, hafi þeir svipt markaðinn hinum mannlega þætti sem sé einmitt ástæða þess að hann virkar. Því miður hafi mörg slæm stefnumál byggt á þessum slæmu hugmyndum og geri enn. Fram kemur í kynningu á bókinni sé fjallað um mörg grundvallaratriði markaðarins, vöxt þeirra og viðgang. Fjallað sé um kosti sérhæfingar, um samkeppni og um siðferði markaðarins.

Butler ræðir á fundinum um hugmyndir sínar í samhengi við atburði í alþjóðlegu efnahagslífi undanfarin misseri og ástandið í dag.

Fundarstjóri er Finnur Oddsson framkvæmdastjóri Viðskiptaráðs. Fundargjald með morgunverði kr. 1.500. Fundurinn er öllum opin og fer skráning fram á www.vi.is eða í síma 5107100.

Hátt í hundrað manns sátu íslenska viðskipta- og fjárfestingakynningu í ráðhúsi Mílanóborgar, Palazzo Marino, hinn 26. maí sl., sem skipulögð var af Ítalsk – íslenska viðskitparáðinu ÍTIS og sendiráði Íslands í Róm í samvinnu við ýmsar stofnanir og fyrirtæki, þ. m. t. Mílanóborg og viðskiptaráðið í Mílanó. Borgarstjórinn í Mílanó, frú Letizia Moratti, ávarpaði fundinn, og Grétar Már Sigurðsson ráðuneytisstjóri utanríkisráðuneytisins fyrir hönd íslenskra stjórnvalda.

Í efnahagsumróti líkt og því sem nú stendur yfir er hætt við að umræða um mikilvæg þingmál, líkt og orkufrumvarp iðnarráðherra, falli milli skips og bryggju í öldugangi almennrar efnahagsumfjöllunar. Þrátt fyrir að tiltölulega lítil umræða hafi farið fram um frumvarpið að undanförnu virðast stjórnvöld engu að síður stefna að lögleiðingu þess nú á síðustu dögum vorþings. Viðskiptaráð telur skynsamlegt að löggjafinn samþykki ekki frumvarpið heldur ígrundi nánar hvernig framtíðarskipan orkumála skuli vera háttað hérlendis.

Frumvarp þetta treystir í sessi eignarrétt hins opinbera yfir orkuauðlindum og orkufyrirtækjum. Opinber eignarréttur orkuauðlinda á, skv. frumvarpinu, að vera fyrsta skref í átt til frekari markaðsvæðingar orkugeirans. Erfitt er að sjá hvernig svo megi vera.

Hagkvæm nýting orkuauðlinda hefur mikla efnahagslega þýðingu fyrir Ísland og hníga hagfræðileg rök að því að stjórnarskrárvarinn séreignarréttur sé bestur til þess fallinn að tryggja slíka nýtingu. Einkaframtakið hefur sannað gildi sitt hingað til þar sem kraftar þess hafa fengið að njóta sín. Líklegt er að það muni einnig eiga við um orkugeirann. Með því að tryggja séreignarréttinn en setja jafnframt almennar leikreglur er unnt að standa mun betur vörð um þjóðhagslega og samfélagslega hagsmuni en með þeim breytingum sem frumvarp þetta boðar.

Sendiráð Íslands í Kaupmannahöfn og Dansk-íslenska viðskiptaráðið efndu til fundar á Bryggjunni miðvikudaginn 22. maí þar sem fjallað var um íslenskt efnahagslíf. Fundurinn tókst afar vel; fundarsóknin var góð og fyrirlesarar skiluðu sínu verki með sóma.

Mikið hefur verið fjallað um íslensk efnahagsmál í dönskum blöðum undanfarna mánuði, mun meira en nokkur staðar annars staðar í heiminum reyndar. Fundurinn á miðvikudag var innlegg sendiráðsins og Dansk-íslensk viðskiptaráðsins í þessa umfjöllun.

Jesper Rangvid er prófessor í fjármögnun við Copenhagen Business og hélt hann erindi um efnið: Islands økonomi og den islandske krone: Et tilbageblik og et fremblik.

Erindi Jesper má nálgast hér.

Þorsteinn Þorgeirsson, aðalhagfræðingur fjármálaráðuneytisins talaði um efnið: Horfur í íslensku efnahagslífi - er hörð lending framundan?

Erindi Þorsteins má nálgast hér.

Þeir sem sóttu fundinn voru aðallega einstaklingar frá dönskum fjármálafyrirtækjum auk áhugafólks um Ísland og íslensk efnahagsmál.

Nánari upplýsingar um fundinn veitir Kristín Hjálmtýsdóttir í síma 510-7100

Vegna umfjöllunar um úttekt viðskiptaháskólans IMD á samkeppnishæfni þjóða vill Viðskiptaráð Íslands koma eftirfarandi á framfæri:

Viðskiptaráð Íslands fagnar því að Alþingi hafi í gær samþykkt frumvarp til breytinga á lögum um tekjuskatt. Frumvarpið felur í sér að hagnaður fyrirtækja af tilteknum afleiðuviðskiptum og sölu hlutabréfa, óháð tímalengd eignarhalds, er nú frádráttarbær frá tekjum þeirra. Breytt fyrirkomulag er í samræmi við ábendingar ýmissa hagsmunaaðila, þ.m.t. Viðskiptaráðs, sem og í samræmi við tillögur starfshóps forsætisráðherra um Ísland sem alþjóðlega fjármálamiðstöð.

Viðskiptaráð fagnar samkomulagi Seðlabanka Íslands við Seðlabanka Svíþjóðar, Noregs og Danmerkur. Tvíhliða gjaldeyrisskiptasamningar sem þessi eru mikilvægt fyrsta skref í eflingu trúverðugleika Seðlabanka Íslands og íslenska hagkerfisins. Enn fremur fagnar Viðskiptaráð þeirri tilkynningu að enn frekar verði aukið við aðgang bankans að erlendu lausafé í náinni framtíð.

Viðskiptaráð óskar Háskólanum í Reykjavík til hamingju með þann frábæra árangur að viðskiptadeild skólans skuli á 10 árum vera komin í hóp 50 bestu viðskiptaháskóla innan Vestur-Evrópu og um leið í hóp bestu viðskiptadeilda heims á háskólastigi.

Í nýrri alþjóðlegri úttekt óháðrar stofnunar (EDUNIVERSAL) var viðskiptadeild Háskólans í Reykjavík valin í hóp 1000 bestu viðskiptadeilda/-háskóla í heiminum - af um 4000 deildum/skólum.

Viðskiptadeild Háskólans í Reykjavík varð í 46. sæti í Vestur-Evrópu og 117. sæti í heiminum.

Viðskiptaráð er stolt af því að hafa allt frá stofnun Háskólans í Reykjavík verið einn af dyggustu bakhjörlum skólans og vonar að þessi glæsilegi árangur viðskiptadeildar verði hvatning til enn frekari dáða, íslensku atvinnulífi og samfélagi til heilla.

Undanfarið hefur mikið verið rætt og ritað um styrk Seðlabanka Íslands og stöðu hans sem lánveitanda til þrautarvara. Í því samhengi hefur verið bent á smæð gjaldeyrisvarasjóðs bankans og skort á lánalínum frá erlendum seðlabönkum. Þrátt fyrir að gjaldeyrisvarasjóður bankans hafi nýlega verið efldur er ljóst að stærð íslenska bankakerfisins krefst mun sterkari umgjarðar en nú er í boði.

Þetta er ekki eingöngu mál sem varðar starfsemi íslenskra fjármálafyrirtækja. Aukinn trúverðugleiki Seðlabanka Íslands er grundvallarþáttur til að snúa við þeirri þróun sem átt hefur sér stað í íslensku hagkerfi undanfarnar vikur og mánuði. Skörp gengisveiking, vaxandi verðbólga, ofurháir stýrivextir, skert aðgengi að lánsfjármagni og stöðnun atvinnulífsins eru vandamál sem koma niður á öllum í íslensku samfélagi. Þegar rætt er um að taka lán til efla gjaldeyrisvarasjóð eða eiginfjárstöðu Seðlabankans og styrkja þannig trúverðugleika íslensks fjármálakerfis er því ekki verið vinna að hagsmunum þröngs hóps á kostnað almennings. Þvert á móti er slík aðgerð óumflýjanlegt fyrsta skref til að koma í veg fyrir víxlverkandi vítahring verðbólgu, gengisveikingar og vaxtahækkana.

Vel heppnað málþing um traust og trúverðugleika á Hilton Reykjavík Nordica var haldið nú í morgun. Fundinn setti Finnur Oddsson, framkvæmdastjóri Viðskiptaráðs Íslands. Í erindi sínu ræddi Finnur mikilvægi trúverðugleika á umrótatímum. Benti hann á að til að afla sér trausts og trúverðugleika gildi tvær þumalputtareglur, hvort sem um er að ræða stjórnvöld, fyrirtæki, fjölmiðla eða einstaklinga. Annars vegar verði að miðla upplýsingum um aðgerðir og markmið með skýrum og gagnsæum hætti og hins vegar verði aðgerðir að fylgja orðum. 

Traust og trúverðugleiki eru meginviðfangsefni morgunverðarfundar sem haldinn verður á vegum AP almannatengsla, Viðskiptaráðs og Capacent Gallup á Hilton Reykjavík Nordica fimmtudaginn 8. maí. Á fundinum verða kynntar niðurstöður úr níundu könnun almannatengslafyrirtækisins Edelman meðal skilgreindra áhrifavalda í 18 löndum. Í könnuninni er mælt traust til fyrirtækja, stjórnvalda, fjölmiðla og félagasamtaka auk þess sem traust og trúverðugleiki boðleiða eru mæld. Við sama tækifæri verður kynnt sambærileg könnun Capacent Gallup á Íslandi en hún er nú gerð í annað sinn. Í lok fundarins verða pallborðsumræður.

Í dag heimsótti forsætisráðherra Finnlands, Matta Vanhanen, skrifstofur Viðskiptaráðs Íslands þar sem hann fundaði með fulltrúum íslensks viðskiptalífs. Heimsóknin er liður í tveggja daga opinberri heimskókn Vanhanen til Íslands. Á fundinum var farið yfir sameiginleg hagsmunamál Íslendinga og Finna á sviði viðskipta. Þar var meðal annars rætt um kosti og galla þess að fjárfesta í finnska hagkerfinu, afstöðu Finna til evrunnar og ESB, möguleika til einkavæðingar í Finnlandi og framtíðarhorfur í efnahagsmálum. Fundinn sátu forsvarsmenn íslenskra fyrirtækja sem eiga hagsmuna að gæta í Finnlandi. Fundinum stýrði Erlendur Hjaltason, formaður Viðskiptaráðs.

Barátta Seðlabankans fyrir stöðugu verðlagi hefur ekki gengið sem skildi
á undanförnum árum og verðbólga hefur því bæði verið há og viðvarandi.
Þetta má að stærstum hluta rekja til mikillar eftirspurnar. Þeir vextir sem
skipta einstaklinga mestu eru húsnæðislánavextir og miðar hækkun
stýrivaxta því m.a. að hækkun þeirra. Með þessum hætti er peningastefnu
Seðlabankans ætlað að sporna gegn þenslu í hagkerfinu. Það skýtur
skökku við að hið opinbera skuli hafa unnið gegn nauðsynlegri hækkun
húsnæðisvaxta með því að niðurgreiða almenn íbúðalán í gegnum
Íbúðalánasjóð. Þetta hefur átt ríkan þátt í því að spilla fyrir virkni
peningastefnunnar undanfarin ár og leitt til þess að stýrivextir hafa orðið
mun hærri en ella. Afleiðingin er að skammtímavextir eru mun hærri en
þeir hefðu þurft að vera, verðbólga hefur verið yfir þolmörkum um árabil
og þenslan mun meiri en annars hefði verið.

Fulltrúar frá lagadeild Háskólans í Reykjavík og Viðskiptaráði Íslands undirrituðu síðastliðin föstudag, 4. apríl, samning um starfsnám samkvæmt 13. gr. reglna um meistaranám við lagadeild Háskólans í Reykjavík. Samkvæmt samningnum samþykkir Viðskiptaráð að bjóða starfsnám fyrir nemendur í meistaranámi við lagadeild Háskólans í Reykjavík. Námsráð lagadeildar Háskólans í Reykjavík metur umsóknir nemenda um starfsnám hverju sinni. Starfsnám hvers nemanda felur  í sér 120 klst. vinnu og skal einingafjöldi fyrir starfsnámið vera metinn af Viðskiptaráði.

Á aðalfundi Samtaka Ferðþjónustunnar (www.saf.is) hélt framkvæmdastjóri Viðskiptaráðs, Finnur Oddsson, erindi um áhrif íslensku krónunnar á starfsemi ferðaþjónustunnar.  Megin niðurstaða var sú að sterkt gengi krónunnar og mikið flökt á síðustu árum hefði kerfisbundin áhrif á þjónustu í greininni, til hins verra. 

Erindið var undir yfirskriftinni Krónan og ferðaþjónustan og má nálgast hér.

Hagfræðingur Viðskiptaráðs, Frosti Ólafsson, hélt erindi um uppgjör og skráningu hlutabréfa í erlendum gjaldmiðli og afleiðingar þess fyrir peningastefnu Seðlabankans á hádegisverðarfundi Félags löggiltra endurskoðenda nú í dag. Að erindi loknu svaraði Frosti spurningum ásamt lögfræðingi ráðsins, Haraldi I. Birgissyni.

Erindið hét Uppgjör í erlendum gjaldmiðlum - eðlileg afleiðing alþjóðavæðingar og má nálgast hér.

Viðskiptaráð Íslands stóð fyrir fjölmennum fundi um stöðu íslensks efnahagskerfis og fjármálafyrirtækja í samstarfi við Sendiráð Íslands í Danmörku og Dansk-íslenska viðskiptaráðsins. Um 150 aðilar úr dönsku viðskiptalífi mættu á fundinn þar sem Ingibjörg Sólrún Gísladóttir, utanríkisráðherra Íslands, Dr. Richard Portes, prófessor við London Business School, Sigurður Einarsson, starfandi stjórnarformaður Kaupþings og Sigurjón Sighvatsson, fjárfestir, héldu erindi. Í kjölfarið voru haldnar pallborðsumræður þar sem gestum gafst færi á að spyrja framsögumenn um stöðu efnahagsmála á Íslandi.

Starf hagfræðings Viðskiptaráðs hefur verið auglýst laust til umsóknar.

Aukin alþjóðavæðing íslensks hagkerfis hefur leitt til þess að stór hluti tekna og fjármögnunar margra fyrirtækja er í erlendum gjaldmiðlun. Af þessum sökum skapa gengissveiflur íslensku krónunnar mikinn kostnað og óvissu í rekstri viðkomandi fyrirtækja. Til að draga úr kostnaði hafa ýmis fyrirtæki leitað heimildar ársreikningaskrár til að færa uppgjör í erlendan gjaldmiðil. Mörg þeirra hafa þegar fengið þessa heimild en af einhverjum ástæðum lúta fjármálafyrirtæki ekki sömu lögmálum í þessu málefni.

Að mati Viðskiptaráðs eru uppgjör í erlendum gjaldmiðlum eðlilegur fylgifiskur alþjóðavæðingar, en Ísland er nú þátttakandi á markaði sem er margfalt stærri en hagkerfið í heild. Til að styrkja frekar stöðu íslenskra fyrirtækja og gera þau að fýsilegri valkosti fyrir erlenda fjárfesta er mikilvægt að fyrirtækjum verði gert kleift að færa uppgjör sitt í erlendum gjaldmiðli - án afskipta hins opinbera. Það væri óábyrgt að spyrna við fæti hvað uppgjör í erlendum gjaldmiðlum varðar og stuðla þannig að verra rekstrarumhverfi íslenskra fyrirtækja í alþjóðlegum samanburði.

Það er bæði æskilegt og jákvætt að hið opinbera sé tilbúið að færa kaupmátt úr eigin höndum í hendur atvinnulífs og einstaklinga. Viðskiptaráð Íslands fagnar því áformum ríkisstjórnarinnar að lækka tekjuskatt fyrirtækja úr 18% í 15%, en lækkun álagningar á fyrirtæki hefur verið eitt helsta baráttumál ráðsins um árabil. Þessi tillaga ríkisstjórnarinnar er enn fremur til þess fallinn að styðja við hugmyndir sem fram hafa komið um Ísland sem alþjóðlega fjármálamiðstöð.

Stjórnarkjör aðalfundar Þýsk-íslenska viðskiptaráðsins

Metþáttaka og uppselt var á árlegu Viðskiptaþingi Viðskiptaráðs Íslands. Hátt í 500 gestir mættu, en meðal gesta voru lykilmenn í íslensku viðskiptalífi, ráðherrar, þingmenn, fræðimenn, erlendir sendiherrar og embættismenn. Yfirskriftin var að þessu sinni: “Krónan: Byrði eða blóraböggull” og var tileinkuð skipan peningamála hérlendis.

Erlendur Hjaltason, forstjóri Exista og formaður Viðskiptaráðs, sagði í setningarræðu Viðskiptaþings 2007 að nú væri tími orða af hálfu hins opinbera liðinn og tími aðgerða þyrfti að taka við. Var hann þar m.a. að visa til þess óróa sem hefur einkennt krónuna að undanförnu og skorts á stefnumótun stjórnvalda í gjaldeyris- og efnahagsmálum. Erlendur sagði einnig: “það er því skýlaus krafa bæði viðskiptalífs og almennings, að þessi mál séu rædd opinskátt og af krafti og ákvarðanir teknar af skilvirkni. Með öðrum hætti verður þeirri óvissu sem ríkir í rekstrarumhverfi fyrirtækja og efnahagslífi Íslendinga ekki eytt.”

Aðalfundur Viðskiptaráðs Íslands verður haldinn á Hilton Reykjavík Nordica miðvikudaginn 13. febrúar nk. kl. 11:00. Þá mun jafnframt fara fram Viðskiptaþing Viðskiptaráðs kl. 13:00 sem að þessu sinni er haldið undir yfirskriftinni „Krónan – byrði eða blóraböggull“?

Yfir 400 manns hafa skráð sig á árlegt Viðskiptaþing Viðskiptaráðs Íslands, en skráningu lýkur í dag. Meðal gesta verða lykilmenn í íslensku viðskiptalífi, ráðherrar, þingmenn, fræðimenn, erlendir sendiherrar og embættismenn. Þingið verður haldið á Hilton Reykjavík Nordica milli klukkan 13:30 og 16:30 á morgun. Yfirskrift þingsins er að þessu sinni: „Íslenska krónan: byrði eða blóraböggull?“ og er þingið tileinkað stöðu peningamála á Íslandi.

Hátt í 260 manns sóttu Skattadag Deloitte, Samtaka Atvinnulífsins, Viðskiptablaðs Morgunblaðsins og  Viðskiptaráðs Íslands núna í morgun á Grand Hótel. Á fundinum fjallaði Richard Teather prófessor við Bournemouth University um skattasamkeppni, Guðmundur Skúli Hartvigsson lögfræðingur á skatta- og lögfræðisviði Deloitte um helstu breytingar á skattalögum á árinu 2007, Jörundur Þórarinsson verkefnisstjóri á skatta- og lögfræðisviði Deloitte um skatta- og lagalega stöðu erlends starfsfólks hérlendis og loks Vala Valtýsdóttir forstöðumaður skatta- og lögfræðisviðs Deloitte um tvísköttun á virðisaukaskatti. Fundarstjóri var Guðrún Hálfdánardóttir aðstoðarfréttastjóri Morgunblaðsins, en Árni M. Mathiesen fjármálaráðherra setti fundinn með stuttu erindi.