Hlutverk

Viðskiptaráð Íslands eru frjáls samtök félaga, fyrirtækja og einstaklinga í íslensku atvinnulífi. Allir sem stunda rekstur, hvort sem er í smáum eða stórum stíl, geta átt aðild að ráðinu. Viðskiptaráð er vettvangur atvinnulífsins til þess að vinna að hvers konar framförum að bættu starfsumhverfi og aukinni velmegun.

Megintilgangur Viðskiptaráðs er og hefur ávallt verið að gæta hagsmuna viðskiptalífsins. Hagsmuna ber fyrst og fremst að gæta gagnvart stjórnvöldum, en einnig í síauknum mæli gagnvart erlendum aðilum. Það er ekki síður hlutverk Viðskiptaráðs að efla skilning almennings á mikilvægi frjálsræðis í viðskiptum, lágmörkun opinberra afskipta, hagfellds skattaumhverfis og annarra þátta er miða að því að auka samkeppnishæfni Íslands. Í starfi sínu hefur ráðið ávallt haft það að leiðarljósi að viðskiptalífinu sé best borgið með frjálsri samkeppni, því þannig fái kostir einkaframtaksins að njóta sín.

Viðskiptaráð berst jafnt fyrir málum er varða viðskiptalífið allt sem og hagsmunamálum einstakra félaga. Reglulega eru gefnar út skýrslur og skoðanir um þau málefni sem eru efst á baugi í viðskiptalífinu hverju sinni auk þess sem ráðið gerir þeim málum ítarleg skil sem aðildarfélög telja mikilvægt að tekin séu til umræðu á opinberum vettvangi.

Viðskiptaráð er öflugur bakhjarl menntunar og hefur lagt sérstaka áherslu á uppbyggingu viðskiptanáms hérlendis. Í gegnum Sjálfseignarstofnun Viðskiptaráðs Íslands um viðskiptamenntun (SVÍV) á ráðið bæði Verzlunarskóla Íslands og meirihluta í Háskólanum í Reykjavík. Öflugt menntakerfi er forsenda samkeppnishæfi hagkerfa og því er stuðningur Viðskiptaráðs við menntun á Íslandi mikið hagsmunamál fyrir atvinnulífið.

Viðskiptaráð skilar umsögnum í tengslum við alla lagasetningu á sviði efnahags- og viðskiptamála og hefur þannig frumkvæði að úrbótum á lögum. Auk þess getur ráðið kallað eftir öðrum frumvörpum til umsagnar er varða hagsmuni aðildarafélaga.

Ráðið er einnig vettvangur innlendra og alþjóðlegra tengsla. Í gegnum tíðina hefur farið fram öflugt samstarf við önnur viðskiptaráð og hagsmunasamtök erlendis sem miðar að því að bæta aðgengi innlendra fyrirtækja að erlendum mörkuðum og styrkja velvild í þeirra garð. Ráðið starfrækir einnig sérstök millilandaráð, bæði með beinum hætti og í samstarfi við aðra. Í dag eru sjö millilandaráð starfrækt af hálfu Viðskiptaráðs.

Með því að gerast aðili að Viðskiptaráði Íslands getur fyrirtæki þitt tekið þátt í að móta íslenskt viðskiptalíf, notfært sér margvíslega þjónustu ráðsins, komið hugmyndum og málefnum á framfæri, varið mikilvæga viðskiptahagsmuni í gegnum þriðja aðila og eflt bæði innlent og alþjóðlegt tengslanet.

Ef þú óskar eftir nánari upplýsingum um Viðskiptaráð vinsamlega hafðu samband við Finn Oddsson framkvæmdastjóra ráðsins í síma 510-7100.