Starfsemi í 90 ár

Upphafleg lagagrein um verkefni og verksvið ráðsins hljóðaði á eftirfarandi máta:

A. Að svara fyrirspurnum frá Alþingi, stjórnvöldum og öðrum um verzlunar-, vátryggingar-, toll-, og samgöngumál og annað það, er varðar atvinnugreinar þær, sem ráðið er fulltrúi fyrir. Ráðið skal einnig af sjálfsdáðum, ef þörf þykir, gera tillögur eða láta í ljós álit sitt á þessum efnum

B. Að vinna að því að koma á festu og samræmi í viðskiptavenjum

C. Að koma á fót gerðardómum í málum, er varði þær atvinnugreinar, er hér um ræðir

D. Að safna, vinna úr og birta skýrslur um ástand þessara atvinnugreina eftir því sem föng eru á

E. Að fylgjast með erlendri löggjöf og öðrum atburðum, er kunna að hafa áhrif á atvinnuvegi landsins

F. Að gefa út blað, þegar fært þykir, er skýri frá því markverðasta í viðskiptamálum innanlands og utan. Í blaðinu skulu einnig birt lög og stjórnarskipanir, er snerta atvinnumál 

Flest þessi verkefni eru unnin af ráðinu enn þann dag í dag. Þó hafa störf þess að sjálfsögðu þróast með breyttum tímum og því er ekki úr vegi að drepa stuttlega á helstu áherslumál ráðsins í gegnum tíðina.

Umsagnir um lagafrumvörp
Ráðið hefur veitt umsögn um flest þau lagafrumvörp sem fram hafa komið tengd viðskipta-, efnahags- og skattamálum. Þær umsagnir miða að því að standa vörð um hagsmuni aðildarfélaga ráðsins sem og koma með leiðbeinandi athugasemdir til að auka samkeppnishæfni íslensks hagkerfis. Reynslan hefur sýnt að Alþingi tekur slíkar umsagnir til skoðunar og hefur oftar en ekki látið ábendingar ráðsins sig varða. Ennfremur hefur ráðið átt þátt í ýmsum samningum er varða viðskiptamál með beinum eða óbeinum hætti.

Fundir og fyrirlestrar
Ráðið hefur í gegnum tíðina gengist fyrir ýmsum fundum og fyrirlestrum um viðskipta-, skatta- efnahags-, atvinnu- og menntamál. Á fundunum hefur verið skapaður umræðuvettvangur fyrir mikilvæg mál og í mörgum tilfellum hafa þeir haft mótandi áhrif á framvindu viðkomandi mála. Árlega heldur ráðið Viðskiptaþing (áður Verslunarþing) þar sem lykilmenn í íslensku viðskiptalífi, ráðherrar, þingmenn, fræðimenn, erlendir sendiherrar, fjölmiðlar, embættismenn og fleiri gestir hittast. Hefð hefur myndast fyrir því að auk formanns ráðsins haldi forsætisráðherra landsins ræðu á þinginu. Þar er tekið á málefnum líðandi stundar í íslensku viðskiptalífi með líflegum ræðuhöldum og umræðum í kjölfarið.

Barátta gegn óeðlilegum hömlum og höftum
Ráðið hefur látið ýmis málefni sig sérstaklega varða. Frá upphafi hefur það verið eitt af leiðarljósum ráðsins að hér verði almennt viðskiptafrelsi. Hömlur og höft verði afnumin að öllu leyti og þau tækifæri sem felast í frjálsri verslun verði nýtt til fullnustu. Ráðið hefur látið til sín taka í skattamálum og lagt fram ýmsar umbótatillögur á þeim vettvangi. Það er von Viðskiptaráðs að í náinni framtíð verði boðið upp á besta skattaumhverfi heims á Íslandi. Ráðið hefur lagt hart að hinu opinbera að sýna ráðdeild í ríkisrekstri og alls ekki hrófla við mörkuðum þar sem fyrir ríkir samkeppni einkaaðila. Viðskiptaráð hefur að sama skapi lagt fram tillögur um möguleika til einkavæðingar. Ennfremur hefur ráðið bent á möguleika til meiri nýtingar einkaframtaks í þjónustuframboði hins opinbera.

Skýrslur ráðsins og þátttaka þess í opinberri umræðu
Til að vinna að framgangi hagsmunamála atvinnulífs hefur ráðið beitt ýmsum aðferðum. Starfsemin hefur bæði farið fram á opinberum vettvangi, en einnig að tjaldabaki þar sem unnið hefur verið að ýmsum endurbótum. Á opinberum vettvangi hefur ráðið frumkvæði að umræðu um ýmis mál með blaðagreinum, skoðunum, virkri þátttöku í fjölmiðlaumræðu, ýmis konar skýrslugerð o.m.fl. Þannig hefur Viðskiptaráð staðið vörð um hagsmuni sinna félaga og um leið rutt brautina fyrir ný málefni sem styrkja stöðu þeirra sem og hagkerfisins í heild.