Úttekt á stjórnarháttum

Viðskiptaráð Íslands, Samtök atvinnulífsins, NASDAQ OMX á Íslandi og Rannsóknarmiðstöð um stjórnarhætti við Háskóla Íslands hafa tekið höndum saman til að bæta eftirfylgni fyrirtækja við leiðbeiningar um góða stjórnarhætti. Í þeim tilgangi hafa þessir aðilar undirritað samstarfssamning sem felur í sér að öllum fyrirtækjum gefst tækifæri, frá 1. mars næstkomandi, til að undirgangast formlegt mat á starfsháttum stjórnar og stjórnenda.

Rannsóknarmiðstöðin mun sjá um framkvæmd matsins, en matsferlið byggir í meginatriðum á leiðbeiningum um stjórnarhætti fyrirtækja sem Viðskiptaráð Íslands, Samtök atvinnulífsins og NasdaqOMX gefa út. Neðangreind ráðgjafafyrirtæki, og önnur sem Rannsóknarmiðstöðin telur hæfa til verksins, hafa með höndum söfnun gagna, viðtöl við stjórnarmenn og skýrslugerð til Rannsóknarmiðstöðvarinnar. Fyrirtæki sem hafa áhuga á að annast þennan lið matsferlisins eru hvött til að hafa samband við Dr. Eyþór Ívar Jónsson, forsvarsmann rannsóknarmiðstöðvarinnar.

Þeim fyrirtækjum sem standast matsferlið að mati Rannsóknarmiðstöðvarinnar verður veitt viðurkenning þar að lútandi sem þau geta notað í starfi sínu í eitt ár frá veitingu hennar.

Viðskiptaráð, Samtök atvinnulífsins og NASDAQ OMX munu fyrir sitt leyti hvetja stjórnendur allra fyrirtækja til að undirgangast mat á stjórnarháttum þeirra. Að auki munu þessir aðilar veita fyrirtækjunum áðurnefnda viðurkenningu og halda þannig merkjum þeirra á lofti sem eru öðrum fyrirmynd um góða stjórnarhætti.

Fyrirtæki sem hafa áhuga á að undirgangast mat á stjórnarháttum geta haft samband við neðangreinda tengiliði, Rannsóknarmiðstöðina eða Viðskiptaráð Íslands. Fyrirtæki standa sjálf straum af kostnaði þess ráðgjafafyrirtækis sem þau ráða til verksins og Rannsóknarmiðstöðvarinnar.

Þegar fyrirtæki hafa lokið ferlinu hjá einum af úttektaraðilunum geta þeir sent skýrslur sínar til forsvarsmanns rannsóknarmiðstöðvarinnar, dr. Eyþór Ívars Jónssonar (eij.mba@cbs.dk). Viðmiðunarverð fyrir stærri fyriræki og þá heildstæða skýrslugjöf er 350.000 kr.

Tengiliður Viðskiptaráðs er Haraldur I. Birgisson, aðstoðarframkvæmdastjóri ráðsins.