Viðskiptaráð hefur gefið út skýrsluna The Icelandic Economy. Í skýrslunni er farið yfir íslenska hagkerfið og stöðu efnahagsmála hérlendis á aðgengilegan hátt. Ragnar Sigurður Kristjánsson, hagfræðingur á málefnasviði Viðskiptaráðs, fer í þessum fyrirlestri yfir skýrsluna í þremur hlutum. Meðal annars er þar fjallað um þróun helstu hagvísa, stöðu og horfur í efnahagslífinu, verðbólgu, utanríkisviðskipt og samkeppnishæfni, auk annarra atriða sem varða efnahagsmál.

Heimurinn er að breytast hraðar en við höfum séð um langt skeið. Tollastefna Donalds Trump, forseta Bandaríkjanna, hefur sett alþjóðaviðskipti úr skorðum, og margir velta nú fyrir sér hvert framhaldið verður. Guðlaugur Steinarr Gíslason, fjárfestingastjóri hjá Viska Digital Assets, fjallar um hvernig þessi stefna Bandaríkjanna í alþjóðaviðskiptum gæti mótað nýja heimsmynd.

Það felast ýmis tækifæri fyrir fyrirtæki í því að nýta sér þjónustu sjálfstætt starfandi sérfræðinga. GIGG-hagkerfið er ört vaxandi á heimsvísu og mörg af stærstu fyrirtækjunum eru farin að nýta sér þessa þjónustu í auknum mæli. Svipuð þróun hefur einnig átt sér stað hérlendis. Harpa Magnúsdóttir, framkvæmdastjóri hjá Hoobla, fer í þessum fyrirlestri yfir kosti þess að nýta sér liðssinni sjálfstætt starfandi sérfræðinga. Rannsóknir sýna að störf eru að breytast: ný störf verða til og önnur verða úrelt. Samhliða sýna rannsóknir að um 50% starfsfólks vill vinna sjálfstætt. Harpa fer meðal annars yfir hvernig fyrirtæki fylla þekkingargap innan sinna raða með því að ráða sjálfstætt starfandi sérfræðinga í hlutastarf eða til tímabundinna verkefna.

Hvernig geta fyrirtæki og stofnanir notfært sér gervigreind til að bæta sinn rekstur? Hver er munurinn á að leyfa starfsfólki að kaupa aðgang að GenAI vörum á borð við ChatGPT og að nýta sér gervigreind sem hluta af skilgreindum verkferlum? Kristján Freyr Kristjánsson, framkvæmdastjóri hjá 50skills fer yfir notkun á gervigreind sem er hægt að yfirfæra á nær allan rekstur fyrirtækja og stofnana. Kristján sýnir hvernig vinnustaðir geta kortlagt sína ferla og forgangsraðað þeim ferlum sem rökrétt er að byrja á að taka fyrir. Raundæmi eru tekin fyrir sem hægt er að aðlaga og beita á öðrum sviðum í rekstri. Jafnframt er farið yfir lagaleg og siðferðileg atriði.

Það er þungt áfall fyrir fyrirtæki að verða fyrir netárás. Stjórnendur leika lykilhlutverk í því að skapa heilbrigða öryggismenningu. Gömul kerfi geta verið rekstraráhætta og stjórnendur þurfa vinna vel með sínu tæknifólki. Emil Örn Víðisson, sérfræðingur í netöryggi hjá Advania, fer yfir algengustu form árása og hvernig er hægt með virku samtali að lágmarka hættu á alvarlegum árásum.

Hvenær á að sækja um einkaleyfi og hvers virði er að tryggja hugverkarétt? Einar Mäntylä, sérfræðingur á sviði hugverkaréttar, fer í þessum fyrirlestri yfir ferlið frá upphafi til enda. Farið er yfir lög um einkaleyfi, hvernig á að sækja um einkaleyfi og hversu mikils virði  hugverkaréttur er fyrir fyrirtæki í dag.

María Guðjónsdóttir, lögfræðingur Viðskiptaráðs, fer yfir það hvernig stjórnir og stjórnendur  geta nýtt sér leiðbeiningar um stjórnarhætti fyrirtækja. Viðskiptaráð stendur að útgáfu leiðbeininganna ásamt Samtökum atvinnulífsins og Nasdaq. Góðir stjórnarhættir styrkja innviði fyrirtækja og efla traust gagnvart þeim.

Hvað felst í nýrri reglugerð um gervigreind frá ESB? Hvaða kerfi falla undir reglugerðina og hvaða aðilar þurfa að huga að henni? Í þessum fyrirlestri fer Lára Herborg Ólafsdóttir, lögmaður á LEX lögmannsstofu, yfir allt það helsta sem stjórnendur þurfa að hafa í huga sem snýr að nýlegri reglugerð um gervigreind.