Viðskiptaráð Íslands stendur fyrir morgunverðarfundi á morgun, miðvikudag, en meðal framsögumanna er Arnór Sighvatsson aðstoðarbankastjóri Seðlabanka Íslands. Erindi hans ber heitið Höftin, ríkisfjármál og efnahagsbatinn, en í því mun Arnór fjalla um samspil þessara þriggja þátta og áhrif þeirra á aðgengi Íslands að lánsfjármagni.
Auk Arnórs munu Þórður Friðjónsson forstjóri Kauphallarinnar og Ragnar Guðmundson forstjóri Norðuráls flytja erindi á fundinum. Að erindum loknum mun Benedikt Jóhannesson, ritstjóri Vísbendingar, stýra pallborðsumræðum. Í pallborðinu eru auk frummælenda Agnar Hansson forstöðumaður markaðsviðskipta hjá H.F. Verðbréfum, Kristinn Hafliðason verkefnisstjóri hjá Fjárfestingarstofu og Tanya Zharov lögfræðingur Auðar Capital.
Fundurinn ber heitið Er Ísland opið fyrir fjárfestingu - Frá orðum til athafna?
Fundurinn fer fram í Hvammi á Grand Hótel, hann hefst kl. 8.15 og stendur til kl. 10.