Viðskiptaráð Íslands211 breytingar á skattkerfinu frá árinu 2007
Frá árinu 2007 hafa verið gerðar 211 breytingar á skattkerfinu. Breytingarnar skiptast í 51 skattalækkun og 160 skattahækkanir. Fyrir hverja skattalækkun hafa því skattar verið hækkaðir ríflega þrisvar sinnum. Þetta eru niðurstöður uppfærslu á yfirliti Viðskiptaráðs Íslands yfir skattabreytingar undanfarinna ára.
Veigamestu breytingarnar frá árinu 2007 eru eftirfarandi:
- Tekjuskattur einstaklinga (efsta þrep) hefur hækkað um 34%
- Meðalútsvar hefur hækkað um 11%
- Fjármagnstekjuskattur hefur hækkað um 100%
- Erfðafjárskattur hefur hækkað um 100%
- Skattur á neftóbak hefur hækkað um 459%
- Kolefnisgjöld á bensín og díselolíu hafa hækkað um 107%
- Almennt gjald af eldsneyti hefur hækkað um 176%
- Tryggingagjald hefur hækkað um 38%
Jákvæðar breytingar um áramótin
Þónokkar skattalækkanir komu til framkvæmda um áramótin 2015-2016. Tekjuskattur var lækkaður, tollar á fatnað og skó afnumdir, orkuskattur á rafmagn afnuminn og tryggingagjald og útvarpsgjald lækkuð. Áætlað umfang þessara lækkana nemur um 11 ma. kr. á ári.
Viðskiptaráð hvetur stjórnvöld til að haldi áfram á þessari braut. Með því að lækka fleiri skatta á komandi árum er hægt að vinda ofan af óhagfelldri þróun skattkerfisins á fyrstu árum efnahagslægðarinnar. Þannig má styrkja forsendur aukinnar verðmætasköpunar og bættra lífskjara á komandi árum.
