Marel hlaut viðurkenningu fyrir sjálfbærniskýrslu ársins

8. jún 2023

Viðurkenning fyrir sjálfbærniskýrslu ársins var veitt í hádeginu við hátíðlega athöfn

Fulltrúar Marel við afhendingu viðurkenningar fyrir sjálfbærniskýrslu ársins 2023

Fyrr í dag veittu Festa - miðstöð um sjálfbærni, Stjórnvísi og Viðskiptaráð viðurkenningu fyrir sjálfbærniskýrslu ársins. Þetta er í sjötta sinn sem viðurkenningin er veitt og sem fyrr var hátíðleg stemning þegar fulltrúar útgefanda skýrslunnar veittu viðurkenningunni móttöku. Frá árinu 2018 hefur viðurkenningin verið veitt fyrirtækjum og stofnunum sem birta upplýsingar um sjálfbærni sína og samfélagsábyrgð með markvissum og vönduðum hætti. Fyrri handhafar viðurkenningarinnar eru Play, Lífeyrissjóður verzlunarmanna, BYKO, Landsvirkjun, Krónan, Landsbankinn og Isavia.

Að þessu sinni var það Marel sem dómnefnd taldi hafa gefið út eftirtektarverðustu sjálfbærniskýrslu ársins 2023, fyrir rekstrarárið 2022. Líkt og fyrri ár fjölgaði þeim skýrslum sem hlutu tilnefningu á milli ára og voru 35 skýrslur tilnefndar að þessu sinni.

Ítarleg skýrsla sem tekur tillit til helstu staðla

Hátæknifyrirtækið Marel starfar á alþjóðlegum markaði og endurspeglar upplýsingagjöf félagsins þann veruleika. Innan Marel hefur farið fram greining á hvaða sjálfbærnimælikvarðar eru viðeigandi fyrir þeirra atvinnugrein, svokölluð mikilvægisgreining. Það er mat dómnefndar að skýrslan sýni hvernig mikilvægisgreiningin nýtist í upplýsingagjöf og að meiri losun gróðurhúsalofttegunda í sjálfbærniskýrslu sé ekki endilega verra, heldur endurspegli aukna áherslu á betri gögn sem svo verða tól til skilvirkari ákvarðana.

Í rökstuðningi dómnefndar fyrir vali ársins segir að sjálfbærniskýrsla Marel birti viðeigandi upplýsingar og beri af, bæði í samanburði við innlend og erlend fyrirtæki:

„Sjálfbærniskýrsla Marels ber af sé hún borin saman við skýrslur og upplýsingagjöf innlendra fyrirtækja, og einnig sé litið til erlendra fyrirtækja sem leiða slíka upplýsingagjöf. Skýrslan er mjög ítarleg og tekur tillit til helstu staðla við gerð og birtingu sjálfbærnigagna en Marel birtir í ársskýrslu sinni almenna sjálfbærniskýrslu, Nasdaq ESG mælikvarða sérstaklega ásamt TCFD upplýsingum. Það má því segja að upplýsingagjöfin sé breið. Innan Marel hefur farið fram ítarlegri greining á umfangi 3, sem er óbein losun gróðurhúsalofttegunda en fyrirtækið birtir nú einnig óbeina losun vegna notkunar viðskiptavina á þeim tækjum sem Marel selur. Sú losun er stærsti hluti óbeinnar losunar Marel og fanga þessar upplýsingar áhuga lesanda.“

Gögn birt til virðisauka en ekki af skyldurækni

Það var Reynir Smári Atlason, forstöðumaður sjálfbærnimála hjá Creditinfo, sem veitti dómnefnd viðurkenningarinnar formennsku. Reynir Smári segir það ánægjulegt að veita Marel viðurkenninguna enda séu gögn skýrslunnar augljóslega birt til virðisauka fremur en af skyldurækni:

„Sjálfbærniskýrsla Marel ber með sér að þar birtist lesandanum upplýsingar sem raunverulega séu nýttar til virðisaukningar fyrir félagið en ekki sem skylduæfing til að uppfylla regluverk. Marel hefur sett sér metnaðarfull markmið og ætlar fyrirtækið meðal annars að draga úr losun frá umfangi 1 og 2 um 42% fyrir árið 2030 miðað við árið 2021 og um 25% í umfang 3. Þá ætlar Marel að endurvinna 90% af úrgangi sínum fyrir árið 2026 og stefnir að kolefnishlutleysi virðiskeðjunnar árið 2040. Það er því virkilega gaman að geta veitt Marel viðurkenningu fyrir sjálfbærniskýrslu ársins 2023.“

Leggja sig fram við að veita skýrar og áreiðanlegar upplýsingar

Þorsteinn Kári Jónsson, forstöðumaður sjálfbærni og samfélagstengsla, veitti viðurkenningunni móttöku fyrir hönd Marel og var að vonum glaður með árangurinn:

“Við hjá Marel erum afskaplega ánægð með að hljóta þessa viðurkenningu í ár. Síðastliðin 8 ár hefur fyrirtækið gefið út vandaðar og góðar sjálfbærniskýrslur þar sem við höfum lagt okkur sérstaklega fram við að veita skýrar og áreiðanlegar upplýsingar um það hvaða áhrif starfsemin hefur á samfélag okkar og umhverfi,” sagði Þorsteinn Kári.

“Við höfum lagt áherslu á að á hverju ári komi út vandaðri sjálfbærniskýrsla en árið áður og að við séum að mála upp heiðarlega og gegnsæja en um leið gagnlega mynd af þeim árangri sem við höfum náð.

Hluthöfum Marel, stjórnendum og starfsfólki er annt um það að vera treyst fyrir jafn veigamiklu hlutverki í alþjóðlega matvælageiranum og raun ber vitni en að sama skapi erum við stolt af því að geta tekið þátt í því að lyfta íslensku viðskiptalífi upp á hærra plan með því að veita greinargóðar upplýsingar um það hvernig við vinnum skipulega að því að hlúa að sjálfbærri þróun í okkar rekstri.”

Í dómnefnd ársins sátu, auk Reynis Smára Atlasonar, þau Jóhanna Hlín Auðunsdóttir, forstöðumaður loftslags og umhverfis hjá Landsvirkjun og Stefán Kári Sveinbjörnsson, verkefnastjóri í stefnumótun og sjálfbærni hjá Isavia.

Markmið Festu, Stjórnvísis og Viðskiptaráðs með viðurkenningunni er meðal annars ýta undir notkun mælanlegra markmið og vandaðrar upplýsingagjafar á sviði sjálfbærni. Til að sinna þessu og til að undirbúa störf dómnefndar var skipað sérstakt fagráð sem lagði mat á allar þær skýrslur sem hlutu tilnefningu. Fagráðið var skipað þremur nemendum við Háskólann í Reykjavík sem hafa lokið sérstöku námskeiði með áherslu á sjálfbæran rekstur og upplýsingagjöf, þeim Heiðrúnu Örnu Ottesen Þóroddsdóttur, Kára Jóni Hannessyni og Jóhönnu Sól Erlendsdóttur.