Viðskiptaráð ÍslandsSköpum aðstæður fyrir öfluga þekkingarkjarna
Kristrún Mjöll Frostadóttir, hagfræðingur ráðsins, hélt erindi á ársfundi SFS í síðasta mánuði. Kristrún fór yfir hvaða aðstæður þurfa að vera til staðar til að geta skapað öfluga þekkingarkjarna.
Kristrún vakti athygli á þremur mikilvægum þáttum til að byggja upp öflugt samfélag. Í fyrsta lagi þarf að vera til staðar öflugur mannauður. Hægt er að fara tvær leiðir í þeim efnum, annað hvort að byggja upp mannauðinn eða laða hann til sín. Í öðru lagi þarf að skapa fyrirtækjum stöðugt rekstrarumhverfi. Nefndi hún í því samhengi Írland, sem hefur verið þekkt fyrir lága fyrirtækjaskatta, en það var ekki fyrr en Írland fór að setja meira kraft í menntun og hlúa að mannauðnum að alþjóðleg fyrirtæki fóru að sjá sér hag í því að vera með starfsemi þarlendis. Þá vakti hún athygli á hættunni a að missa innlend fyrirtæki úr landi ef rétta rekstrarumhverfið er ekki til staðar eða ef keppt er á of stórum mörkuðum á alþjóðavísu. Í þriðja lagi þarf að skapa gott umhverfi til að laða mannauðinn í þekkingarkjarnana þannig að fyrirtækin geti nýtt sér mannauðinn. Grunnþjónusta þarf að vera til staðar svo sem öflugir skólar og heilbrigðisþjónusta. Ekki er því nóg að aðeins einn þáttur sé í lagi heldur verður að hlúa að öllum þáttunum til þess að skapa sjálfbært samfélag.