Umfjöllun um stuðningsstuðul atvinnulífsins

Fjallað var um stuðningsstuðul atvinnulífsins í nýjustu útgáfu Viðskiptablaðsins, en Viðskiptaráð hefur gefið hann út frá árinu 2011. Stuðullinn segir til um hversu margir einstaklingar eru studdir með opinberu fjármagni eða millifærslum fyrir hvern vinnandi einstakling í einkageiranum.

Í samtali við Viðskiptablaðið sagði Frosti Ólafsson, framkvæmdastjóri Viðskiptaráðs, að Ísland væri að þokast í rétta átt og þar spili minnkað atvinnuleysi stórt hlutverk. Það sé þó tvennt sem stingi í augun. Annars vegar hlutfall opinberra starfsmanna, sem hefur staðið í stað frá árinu 2009 þrátt fyrir aðhaldsaðgerðir. Frosti sagði þetta því benda til að hagræðingaraðgerðir hafi fremur beinst að samdrætti í fjárfestingum og öðrum skammtímalausnum í stað nauðsynlegra kerfislægra breytinga: „Til að nýta fjármagn sem best og gera hinu opinbera kleift að greiða samkeppnishæf laun ættu stjórnvöld að setja sér það markmið að lækka þetta hlutfall“

Fjöldi einstaklinga utan vinnumarkaðar veldur einnig áhyggjum, en þrátt fyrir mannaflsfrekar framkvæmdir og uppgang í greinum líkt og ferðaþjónustu hefur ekki tekist að færa atvinnuþátttöku í fyrra horf. Stuðningsstuðullinn gefur vísbendingu um hvort jafnvægi sé á milli umsvifa einkageirans og hagkerfisins í heild, þó hann sé ekki fullkominn mælikvarði frekar en aðrir hagvísar. Viðskiptaráð telur mikilvægt að stjórnvöld vinni að því að ná stuðlinum neðar þar sem sterkur einkageiri er drifkraftur verðmætasköpunar og bættra lífskjara.

Nánari umfjöllun má lesa í Viðskiptablaðinu 14. ágúst.

Tengt efni

Viðskiptaþing 2012: Virði nýrra flugleiða á við aflaverðmæti fimm togara

Birkir Hólm Guðnason, framkvæmdastjóri Icelandair, fjallaði á Viðskiptaþingi, ...
15. feb 2012

Afdráttarskattar draga úr vaxtarmöguleikum

Í lok júní 2009 voru samþykkt lög sem innleiddu nýtt ákvæði þess efnis að ...
1. okt 2010

Velferðarkerfið byggir á atvinnurekstri

Umræða undanfarinna missera um íslenskt atvinnulíf er um margt þversagnakennd. ...
11. maí 2011