Viðskiptaráð styrkir afreksnema á erlendri grundu

Styrkþegar í ár eru Gunnar Þorsteinsson, Helga Kristín Ólafsdóttir, Ísak Valsson og Vigdís Gunnarsdóttir. Hvert þeirra hlýtur styrk að upphæð 1.000.000 kr.

Árlega veitir Menntasjóður Viðskiptaráðs námsstyrki til íslenskra nemenda í framhaldsnámi í atvinnulífstengdum greinum á háskólastigi. Námsstyrkjum úr Menntasjóði Viðskiptaráðs er einkum ætlað að mæta kostnaði vegna skólagjalda og rannsóknarnáms og eru þeir veittir vegna framhaldsnáms í greinum sem tengjast atvinnulífinu og stuðla að framþróun þess.

Auglýst var eftir umsóknum síðla árs 2022 og var umsóknarfresturinn til og með 8. janúar 2023 en að þessu sinni ákvað valnefnd sjóðsins að leggja áherslu á að styrkja nemendur í framhaldsnámi á háskólastigi í svokölluðum STEAM greinum, auk þess að styrkja að minnsta kosti einn nemanda í orkutengdum greinum.

Styrkþegar ársins voru svo tilkynntir á Viðskiptaþingi 9. febrúar 2023, sem einmitt var helgað orkumálum, en hvert þeirra hlaut námsstyrk að upphæð 1.000.000 kr.

Styrkþegar úr Námsstyrkjasjóði Menntasjóðs Viðskiptaráðs árið 2023 eru:

  • Gunnar Þorsteinsson, doktorsnemi í rafhlöðuverkfræði við Columbia-háskóla
  • Helga Kristín Ólafsdóttir, doktorsnemi í hagnýtri stærðfræði og tölfræði við Gautaborgarháskóla
  • Ísak Valsson, doktorsnemi í tölfræði við Oxford-háskóla
  • Vigdís Gunnarsdóttir, meistaranemi í hagnýtris stærðfræði við ETH Zürich

Það var valnefnd Námsstyrkjasjóðs sem valdi styrkþegana úr stórum hópi umsækjenda, en nefndina skipa þau dr. Ari Kristinn Jónsson, forstjóri AwareGO, dr. Daði Már Kristófersson, prófessor og varadeildarforseti félagsvísindasviðs Háskóla Íslands, og Guðbjörg Edda Eggertsdóttir, fyrrum forstjóri Actavis á Íslandi.

Viðskiptaráð óskar styrkþegum innilega til hamingju með styrkina en hér fyrir neðan má sjá stuttar myndbandskveðjur frá styrkþegunum fjórum. Viðskiptaráð þakkar einnig þeim fjölmörgu sem sendu inn styrkumsókn þetta árið en valnefndin var einróma um að hópur umsækjenda væri afar sterkur.

 

Tengt efni

Vilt þú efla samkeppnishæfni Íslands?

Nú er opið fyrir umsóknir um styrki úr Framtíðarsjóði Viðskiptaráðs Íslands. ...
5. des 2023

Nauðsynlegt er að tryggja samkeppnishæfan vinnumarkað

Umsögn Viðskiptaráðs um frumvarp til laga um breytingu á lögum um ...
15. mar 2023