Er íslensk króna orðin jafngild erlendri?

Þrátt fyrir að niðurstaða stjórnvalda um hertar aðgerðir á landamærunum sé skiljanleg og mögulega sú rétta hringja háværar viðvörunarbjöllur þegar algjörlega er skautað fram hjá lykilatriði í leið að niðurstöðunni. 

Í minnisblaði fjármála- og efnahagsráðherra um hertar aðgerðir á landamærunum er farið um víðan völl. Það sem þar er ekki að finna er þó sennilega athyglisverðast. Ekki er orði minnst á greiðslujöfnuð, 19% veikingu krónunnar, gjaldeyristekjur eða annað slíkt þrátt fyrir að aðgerðinni sé beint að langstærsta uppruna gjaldeyris síðustu ára – ferðaþjónustu. 

Fyrir lítið land með einhæfa framleiðslu er útflutningur grundvallarforsenda innflutnings sem er svo aftur mikilvægur þáttur í okkar neyslu, fjárfestingum og daglegu lífi. Því er ekki hægt að bera saman framlag innlendrar neyslu og útflutningstekna til landsframleiðslu eins og það kemur af skepnunni þar sem annað (neysla) er að talsverðu leyti háð hinu (útflutningstekjum). Með einföldun má segja að ferðaþjónusta hafi séð fyrir þeim gjaldeyri sem þurfti til að flytja inn allar mat-, fjárfestingar- og neysluvörur auk flutningatækja árið 2019. Og gott betur (sjá mynd). 

Hvort hertar aðgerðir séu efnahagslega skynsamlegar er í ljósi óvissunnar erfitt að fullyrða um. Þrátt fyrir að niðurstaða stjórnvalda sé skiljanleg og mögulega sú rétta hringja háværar viðvörunarbjöllur þegar algjörlega er skautað fram hjá lykilatriði í leið að niðurstöðunni. 

Konráð S. Guðjónsson, hagfræðingur Viðskiptaráðs Íslands

Greinin birtist fyrst í „Ráðdeildinni“ í Markaðnum 19. ágúst 2020.

Tengt efni

Að kippa vísitölu úr (húsnæðis)lið

Þegar allt kemur til alls er varhugavert að breyta undirliggjandi þáttum ...
10. mar 2022

Þetta er ekki búið fyrr en það er búið

Svanhildur Hólm gerir upp árið 2021 - sýninguna sem ekki hefði verið selt inn á.
29. des 2021

Raunveruleg þörf fyrir sóttvarnaaðgerðir er nauðsynleg forsenda útgjalda

Viðskiptaráð kallar eftir afléttingu takmarkana og að athafnafrelsi sé komið að ...
25. jan 2022