Viðskiptaráð ÍslandsViðskiptaþing 2011: Ábyrgð viðskiptalífs og verkefni Viðskiptaráðs
Á árlegu Viðskiptaþingi Viðskiptaráðs, sem nú stendur yfir á Hilton Reykjavík Nordica, ræddi Tómas Már Sigurðsson, formaður ráðsins, m.a. um niðurstöður viðhorfskönnunar sem ráðið lét framkvæma í aðdraganda þingsins. Á fjórða hundrað forsvarsmenn í íslensku atvinnulífi báru þar m.a.kennsl á þau atriði sem helst standa í vegi endurreisnar hagkerfisins. Ríflega helmingur þeirra nefndi laskað orðspor atvinnulífs. Sagði Tómas augljóst að álitshnekkir sem atvinnulíf hefur orðið fyrir gerði endurreisnina erfiðari.
Nauðsynlegt er fyrir atvinnulífið að horfast í augu við þessa staðreynd og bæta úr eins og framast er kostur. Slíkt verður ekki gert nema með samstilltu átaki og þrotlausri vinnu. Síðastliðið sumar hélt Viðskiptaráð svo kallað Umbótaþing þar sem þátt tóku um 100 félagar ráðsins. Þar kom fram mjög skýr vilji til þess atvinnulífið styddi með afgerandi hætti við bætta stjórnarhætti og aukið gegnsæi í viðskiptalífinu.“
Vakti Tómas athygli á að Viðskiptaráð hafi farið með gagnrýnum hætti yfir störf sín, orð og gerðir, en þessi yfirferð birtist nýlega í skoðun ráðsins Ábyrgð Viðskiptaráðs. Þá hefur Viðskiptaráðs brugðist við þessu með því að ráðast í nokkur verkefni sem nýst gætu atvinnulífinu öllu við að byggja aftur upp traust. Í því sambandi nefndi hann:
- Endurnýjuð og viðameiri útgáfa leiðbeininga um stjórnarhætti fyrirtækja, sem gerir ríkari kröfur til stjórnenda fyrirtækja á öllum sviðum
- Formleg úttekt á stjórnarháttum fyrirtækja í samstarfi við Rannsóknarsetur um stjórnarhætti við Háskóla Íslands, Kauphöll og Samtök atvinnulífsins.
- Fyrirtækjagátt á vefsíðu Viðskiptaráðs þar sem ætlunin er, í samstarfi við atvinnulífið, að gera lykilupplýsingar um stærstu fyrirtæki landsins aðgengilegar öllum. Þar mun stjórn Viðskiptaráðs ganga á undan með góðu fordæmi og þegar hafa nokkur fyrirtæki verið skráð í gáttina. og;
- Með stofnun Efnahagsstofu atvinnulífsins er svo markmið að bæta öflun og miðlun upplýsinga um stöðu hagkerfis og atvinnulífs, en þar væntum við aðkomu fleiri atvinnulífssamtaka, fyrirtækja og menntastofnana.
En rétt er að ítreka, að hér skiptir mestu að allir þeir sem standa í forystu í viðskiptalífs hagi störfum sínum þannig að þau skapi traust. Hér er ekkert smá mál á ferðinni. Traust er ein megin stoð efnahagsstarfseminnar – traust á orðum manna og gerðum samningum, traust á dómstólum og réttarríkinu og traust á stjórnvöldum. Efnahagslegar afleiðingar þess að traust ríki ekki eru mjög alvarlegar, kostnaðurinn er gríðarlegur. Það er því til mikils að vinna.“
Nánar er farið yfir ofangreind verkefni Viðskiptaráðs í skýrslu þingsins Tökumst á við tækifærin – atvinnulíf til athafna.