Upprunavottorð
Upprunavottorðum er ætlað það hlutverk að staðfesta upprunaland tiltekinnar framleiðsluvöru. Hugtakið er fyrst og fremst þekkt úr fríverslunarsamningum, en þeir kveða á um tollfríðindi til handa vöru sem er upprunnin í aðildarlöndum viðkomandi fríverslunarsamnings.
EES bókun um uppruna vöru
Í EES-samningnum er að finna sérstaka bókun um uppruna vöru (Bókun 4). Meginreglan er sú að til þess að vara sé talin hafa EES uppruna þarf hún að vera framleidd innan svæðisins úr hráefnum sem þar eru fengin eða uppfylla tilteknar kröfur um aðvinnslureglur (yfirleitt miðað við að 90% af verðmæti vörunnar eigi rætur að rekja til EES svæðisins).
Í ofangreindri bókun er gerð krafa um notkun tiltekinna eyðublaða til sönnunar á uppruna, þ.e. EUR.1 skírteinis og yfirlýsingar útflytjanda á vörureikningi. Ríkistollstjóri gefur út EUR.1 skírteini og fyrirmynd að orðalagi fyrrgreindrar yfirlýsingar er að finna í IV. viðauka A við bókunina, en viðaukann má nálgast hér á textaformi. Án þessara sannana um uppruna njóta upprunavörurnar ekki hags af ákvæðum EES-samningsins, sbr. 15. gr. bókunarinnar.
Samkvæmt 21. gr. bókunarinnar þá er útflytjanda heimilt að gefa út ofangreinda yfirlýsingu, ásamt því að aðgreina á reikningi uppruna hverrar vöru, ef vörusending inniheldur upprunavörur að heildarverðmæti ekki meira en EUR 6.000. Fari verðmætið yfir það þá þarf annað hvort EUR.1 skírteini eða útflytjandi þarf að vera viðurkenndur, sbr. 22. gr. bókunarinnar. Yfirlýsing þessi þarf að vera vélrituð, stimpluð eða prentuð á vörureikninginn sbr. 6. mgr. 21. gr. bókunarinnar, en skv. 8. mgr. sama ákvæðis getur útflytjandi gefið út yfirlýsingu á vörureikning annars vegar þegar vörurnar eru fluttar út og hins vegar eftir útflutning þó eigi síðar en tveimur árum eftir að innflutningur átti sér stað.
Staðfesting Viðskiptaráðs
Í viðskiptum við ríki sem ekki hafa gert sérstaka samninga um upprunareglur er oft farið fram á staðfestingu á uppruna. Algengt er að erlendur kaupandi vöru fari fram á að íslenskur útflytjandi afli staðfestingar Viðskiptaráðs á yfirlýsingu sinni á því að varan sé íslensk. Ástæðan er það almenna traust sem viðskiptaráðin njóta um heim allan. Eru þau talin áreiðanlegri en t.d. stjórnvöld í ýmsum ríkjum þriðja heimsins. Áritanir á yfirlýsingar eru veittar félagsmönnum án endurgjalds en gegn vægu gjaldi til annarra (1500 kr. pr. áritun).
Hér má nálgast upprunavottorð sem fyllt er út, undirritað og stimplað svo af hálfu Viðskiptaráðs. Athugið að láta Viðskiptaráði í té undirritað aukaeintak. Nánari upplýsingar veita Hulda Sigurjónsdóttir og Birna Ingólfsdóttir.
Tengt efni:
Leit
Flýtileiðir
Mynd
Stjórnborð
