Ekki frekari greiðsludreifing aðflutnings- og vörugjalda

Á síðustu misserum hafa stjórnvöld boðið upp á greiðsludreifingu aðflutnings- og vörugjalda sem úrræði til aðstoðar fyrirtækjum í lausafjárvandræðum. Greiðsludreifing þessi var sett á af hálfu fjármálaráðuneytisins, og stóð síðast til boða vorið 2010. Í meðförum efnahags- og skattanefndar á frumvarpi um breytingar á ýmsum lagaákvæðum um skatta og gjöld var bætt við greiðsludreifingu vegna nóvember og desember 2010.

Greiðsludreifing aðflutnings- og vörugjalda hefur virkað vel fyrir þau fyrirtæki sem eru í lausafjárvandræðum og hefur því skilað góðum árangri. Það er því engin tilviljun að aðilar í innflutningi eru orðnir óþreyjufullir í bið sinni eftir svari um hvort frekari dreifing verði sett á, enda er fyrsta  greiðslutímabil þessara gjalda hafið með gjalddaga þann 15. mars næstkomandi. En þetta er eitt af fáum úrræðum sem stjórnvöld hafa farið út í sem hefur skilað fyrirtækjum góðum árangri.

Hins vegar lítur út fyrir að innflutningsaðilar geti ekki gert ráð fyrir því að frekari greiðsludreifingu aðflutnings- og vörugjalda verði komið á. Erfitt hefur reynst að fá skýr svör frá ráðuneytinu um framhaldið, ástæður sem liggja hér að baki eða hvort gripið verði til annarra úrræða til að létta undir með þeim fyrirtækjum sem hafa nýtt sér þetta. Viðskiptaráð mun halda áfram að þrýsta á að greiðsludreifing aðflutningsgjalda taki til næstu gjalddaga. Bati hagkerfisins hefur verið hægari en vonir stóðu til og úrræði sem þetta er til þess fallið að verja bæði verðmæti og störf.

Tengt efni:

Tengt efni

Dauða­færi ríkis­stjórnarinnar til að lækka vaxta­stig

Viðureignin við verðbólguna er nú eitt brýnasta verkefnið á vettvangi ...
7. jún 2023

Gera þarf breytingar á fjölda og fjármögnunarkerfi sveitarfélaga

Umsögn Viðskiptaráðs um drög að stefnu í málefnum sveitarfélaga (mál nr. 72/2023).
19. apr 2023

Nauðsynlegt að skapa rétta hvata

Umsögn Viðskiptaráðs og SA um endurskoðun á regluverki Jöfnunarsjóðs ...
31. mar 2023