Andlát: Gísli V. Einarsson, fyrrum formaður VÍ

Gísli V. Einarsson, fyrrum formaður Viðskiptaráðs Íslands (áður Verslunarráð Íslands) er fallinn frá 80 ára að aldri. Hann fæddist 14. júní árið 1931 og lést hinn 20. desember sl. Gísli var kjörinn formaður ráðsins árið 1974, en hann var jafnframt tengdasonur Eggerts Kristjánssonar fyrrverandi formanns ráðsins. Gísli var formaður til 1978.

Gísli var stúdent frá Verzlunarskóla Íslands 1952 og viðskiptafræðingur frá Háskóla Íslands 1956. Eftir nám í Danmörku og Bandaríkjunum starfaði Gísli víða. Hann tók við stöðu framkvæmdastjóra Eggerts Kristjánssonar hf. árið 1966 og gegndi því starfi meðan hann sat sem formaður ráðsins. Síðar stofnaði Gísli fyrirtækið Mata hf. og starfaði sem forstjóri þess. Gísli gegndi fjölmörgum trúnaðarstörfum og var m.a. formaður skólanefndar Verzlunarskólans, í stjórn VSÍ og formaður bankaráðs Verslunarbankans. Hann átti stóran hlut í sameiningu Verslunarbankans við Útvegsbanka Íslands, Alþýðubankann og Iðnaðarbankann er þeir sameinuðust undir nafni Íslandsbanka.

Eftirlifandi kona Gísla er Edda Ingibjörg Eggertsdóttir. Börn þeirra eru Guðný Edda, Eggert Árni, Halldór Páll og Gunnar Þór. Útför Gísla fer fram frá Hallgrímskirkju fimmtudaginn 29. desember og hefst athöfnin kl. 13:00. Stjórn og starfsfólk Viðskiptaráðs Íslands votta aðstandendum innilega samúð sína.

Tengt efni

Hitam(ál) – Hvað er málið með álið?

Hugmyndir um takmörkun á stóriðju hér á landi annars vegar og samdrátt í losun á ...
3. apr 2023

Reiðir pennar

Haukur Viðar Alfreðsson, doktorsnemi í skattahagfræði, segir Viðskiptaráð fara ...
15. sep 2022

Hækkun bankaskatts er bjarnargreiði

Hver greiðir raunverulega bankaskattinn?
17. feb 2022