Peningasendingar frá hálaunalandinu

Ein afleiðingin af fjölgun innflytjenda er stökkbreyting peningasendinga milli einstaklinga yfir landamæri

Hér var nýlega fjallað um þá jákvæðu þróun sem hefur orðið með mikilli fjölgun innflytjenda síðustu ár. Slíkar samfélagsbreytingar hafa ýmsar stórar sem smáar afleiðingar.

Ein afleiðingin er stökkbreyting peningasendinga milli einstaklinga yfir landamæri (e. remittances). Á alþjóðavísu eru þær að mestu raktar til peningasendinga innflytjenda í hátekjuríkjum, líkt og Íslandi, til milli- og lágtekjuríkja og nema um 0,8% af heimsframleiðslu.

Á Íslandi hafa þessar greiðslur 9-faldast á tæpum áratug og námu rétt tæpum 33 milljörðum króna í fyrra, sem jafngildir rúmlega 800 þúsund krónum á hvern erlendan ríkisborgara á vinnumarkaði. Aukninguna virðist annarsvegar mega rekja til losunar fjármagnshafta árin 2016 og 2017 en hinsvegar 83% hækkunar launa og þreföldun á fjölda erlendra ríkisborgara á vinnumarkaði frá árinu 2010.

Áréttað skal að enginn þarf að óttast að þessar peningasendingar setji krónuna á hliðina. Í fyrsta lagi eru þessar fjárhæðir ekki ráðandi afl í nærri 3.000 milljarða króna hagkerfi (VLF). Í öðru lagi er þessi sami hópur beint og óbeint mikilvægur hlekkur í útflutningsgreinum sem stuðla að viðskiptaafgangi við útlönd.

Konráð S. Guðjónsson, hagfræðingur Viðskiptaráðs Íslands

Greinin birtist fyrst í „Ráðdeildinni“ í Markaðnum 4. mars 2020.

Tengt efni

Fréttir

Sautján fyrirtækjum veitt viðurkenning fyrir góða stjórnarhætti

Í dag, þann 21. ágúst 2020, veittu Stjórnvísi, Viðskiptaráð Íslands, Samtök ...
21. ágú 2020
Greinar

Innflytjendur – drifkraftur hagvaxtar framtíðarinnar?

Er þróun síðustu ára bara byrjunin og fjölgunin komin til að vera?
25. feb 2020
Umsagnir

Ráðgjafastofa innflytjenda

Viðskiptaráð er í grundvallaratriðum hlynnt þeim markmiðum sem tillagan stefnir ...
28. okt 2018