Framhald á yfirstandandi kreppu

Nú hafa verið birtar tölur um þróun hagkerfisins á öðrum ársfjórðungi. Þar kemur fram að samdráttur hafi verið 3,1% milli ársfjórðunga. Það sem vekur einna helst athygli er hve mikil breytingin er frá áður birtum hagvaxtartölum.

Aðilar ríkisstjórnarinnar og AGS höfðu áður bent á að kreppunni hérlendis væri tæknilega lokið þar sem hagvöxtur hafi mælst tvo ársfjórðunga í röð. Nú sýna hins vegar uppfærðar tölur að á þeim ársfjórðungum sem gert var ráð fyrir hagvexti var í raun samdráttur. Í tölum sem Hagstofan birti fyrr á árinu var gert ráð fyrir því 0,7% hagvexti á fjórða ársfjórðungi síðasta árs en uppfærðar tölur gera ráð fyrir 0,3% samdrætti.

Að sama skapi var gert ráð fyrir því að hagvöxtur yrði 0,6% á fyrsta ársfjórðungi þessa árs en samkvæmt tölum Hagstofunnar  var þó samdráttur upp á 1,2%. Í báðum tilvikum var stærð hagkerfisins ofmetin sem veldur því að hluti þeirrar bjartsýni sem gert hefur vart við sig undanfarið er byggð á röngum forsendum. Þetta eru slæm tíðindi en þó ekki óvænt sökum þess að ládeyða hefur verið yfir atvinnulífinu undanfarna mánuð og gefur til kynna að botninum hafi ekki verið náð í upphafi ársins.

Þar að auki vekja þær skekkjur sem finna má í umræddum gögnum upp spurningar um áreiðanleika þeirra gagna sem liggja að baki og hvort ekki sé þörf á umfangsmeiri rýni á hagtölur frá opinberum aðilum.

Skattahækkanir óviturlegar
Þessar fregnir vekja upp áleitnar spurningar um aðgerðir hins opinbera til að efla fjárfestingu, verðmætasköpun og hagvöxt. Fjárfesting dróst saman um 4,7% á öðrum ársfjórðungi eftir að hafa dregist saman um 51% árið 2009 og 21% árið 2008. Atvinnuvegafjárfesting hefur dregist enn meira saman á þessu tímabili.

Einn af þeim þáttum sem nú eru til skoðunar enn á ný er endurskoðun skattkerfisins. Ljóst má vera að ef efla á fjárfestingu og hagvöxt á næsta ári þá er afar óviturlegt að ráðast í frekari skattahækkanir á þessum tímapunkti. Slíkar hækkanir draga úr hvata til fjárfestingar og ganga þvert gegn því sameiginlega markmiði að efla efnahagslífið hérlendis á komandi árum.

Finnur Oddsson, framkvæmdastjóri Viðskiptaráðs Íslands

Tengt efni

Umsagnir

Frekari fjárauka þörf

Þær aðgerðir sem kynntar hafa verið vegna COVID-19 lofa góðu og styður ...
24. mar 2020
Umsagnir

Stefna til óstöðugleika og ósjálfbærni?

Beita þarf ríkisfjármálum af skynsemi við núverandi aðstæður og setja endurreisn ...
1. sep 2020
Umsagnir

Langþráð skilvirkni í samkeppnislöggjöf

Í íslenskum samkeppnislögum er að finna íþyngjandi ákvæði sem samkeppnislöggjöf ...
6. maí 2020